दलालके चलखेल रोक्न सुन्दर सुदूरपश्चिम यातायातके नयाँ पहल
गाडी नम्बरसहित चालक–परिचालकके परिचयपत्र अनिवार्य
पहुरा समाचाररदाता
धनगढी, २३ असार । सार्वजनिक यातायात सेवाहे थप व्यवस्थित, सुरक्षित ओ यात्रुमैत्री बनैना उद्देश्यके साथ सुन्दर सुदूरपश्चिम यातायात प्रालिसे गाडी नम्बरसहित चालक, परिचालक ओ सहचालकके परिचयपत्र (आईडी कार्ड) जारी करल बा ।
प्रालिसे लागू करके नयाँ व्यवस्थाअनुसार अब प्रत्येक बसमे कार्यरत चालक, परिचालक ओ सहचालकसे अपने कार्यरत गाडी नम्बर उल्लेख करल आधिकारिक परिचयपत्र अनिवार्य रूपमे प्रयोग करही । इहिसे बसपार्कमे अैना यात्रुसे अपने चढ्ना गाडी ओ सम्बन्धित कर्मचारीके सजुले पहिचान कैना सेक्ही ।
प्रालिके अध्यक्ष पदमराज सापकोटासे यात्रुके सहजता ओ विश्वास अभिवृद्धि कैना उद्देश्यसे इे व्यवस्था लागू करल बटैलै । उहाँके अनुसार परिचयपत्रके प्रयोगसे यात्रुहे सही गाडी पहिचान करके सजिलो हुइना, अनावश्यक अन्योल हटैना ओ बसपार्कमे सक्रिय दलालहुकनके चलखेल नियन्त्रणमे समेत सहयोग पुग्ना विश्वास लेहल बा ।
ओस्टेक, प्रालिके कोषाध्यक्ष गोविन्द शाहके अनुसार बसपार्कमे टिकट लेना अैना यात्रहे फे इहे व्यवस्थासे प्रत्यक्ष रूपमे सहजता प्रदान करल बा । “यात्रुसे आधिकारिक कर्मचारीहे सजुल चिन्हा हुइल ओरसे टिकट खरिदसे गाडीमे सवार हुइल प्रक्रियासम थप व्यवस्थित ओ सुरक्षित हुइना बा ,” उहाँ बटैलै । सुन्दर सुदूरपश्चिम यातायात प्रालिसे यात्रुमैत्री सेवा विस्तारसंगे पारदर्शी ओ भरपर्ना सार्वजनिक यातायात प्रणाली निर्माणके लग ओस्टेक, सुधारात्मक कार्यक्रमहे आगामी दिनमेफे निरन्तरता देना जनैले बा ।
