लागुऔषधसहित चार जाने पक्राउ
पहुरा समाचारदाता
धनगढी, २४ असार । अवैध लागुऔषधहित चार जाने पक्राउ परल बटै । कञ्चनपुरके भीमदत्त न.पा.१९ बागफाँटा शुक्रराज टोलसे अवैध लागुऔषध खैरो हेरोइन ४८० मिलिग्राम सहित २ जनहनहे मंगर साँझ प्रहरी पक्राउ करले बा ।
पक्राउ परुइयामे उहे न.पा.१६ बैठना बर्ष २४ के अनिल डगौरा ओ उहे न.पा.९ मटेना बैठना बर्ष २७ के महेश ओड रहल बटै । लागुऔषधके कारोवार हुइटी रहल कना गोप्य सूचनाके आधारमे प्रहरी चौकी बागफाँटा, कञ्चनपुरसे खटल प्रहरीसे चेकजाँच करेबेर उ पदार्थ फेला पारके उ पदार्थ सहित पक्राउ करल हो ।
ओस्टेक करके जिल्ला कञ्चनपुर कृष्णपुर न.पा.९ पिपरीयासे अवैध लागुऔषध खैरो हेरोइन ७८० मिलिग्राम, गाँजा ८० ग्राम ओ एकनाले भरुवा बन्दुक थान–१ सहित २ जनहनहे मंगर रात प्रहरी पक्राउ करले बा ।
पक्राउ परुइयामे उहे ठाउँ बैठना बर्ष ३४ के जोकराज राना ओ हुकान गोसिनीय बर्ष ३८ के जानकी राना रहल बटै ।
हुकान घरमे लागुऔषधके कारोवार हुइटी रहल कना गोप्य सूचनाके आधारमे लागुऔषध नियन्त्रण ब्युरो शाखा कार्यालय धनगढी, इलाका प्रहरी कार्यालय गुलरिया ओ इलाका प्रहरी कार्यालय रैकवार, कञ्चनपुरसे संयुक्त रुपमे खटल प्रहरी हुकान घर कोठा खाँनतलासी करेबेर उ पदार्थ ओ भरुवा बन्दुक फेला पारके पक्राउ करल हो । यी सम्बन्धमे प्रहरी आवश्यक अनुसन्धान करटी रहल बा ।
