प्रदेश सभामे बजेटउपर छलफल सुरु
पहुरा समाचारदाता
धनगढी, २६ असार । सुदूरपश्चिम प्रदेशके आगामी आर्थिक बरस २०८३÷८४ के बजेटउपर प्रदेश सभामे छलफल सुरु हुइल बा ।
बिफेक रोज बैठल सभाके बैठकमे प्रदेश सरकारके बजेटउपर सामान्य छलफल सुरु हुइल हो । छलफलमे भाग लेटी सत्तापक्ष ओ प्रतिपक्षके प्रदेश सभा सदस्य बजेटके आलोचना करल रहिट । सरकारसे बजेट सच्याइ पर्ना उहाँहुक्रनके सुझाव रहल रहे ।
प्रमुख प्रतिपक्षी दल नेपाली कम्युनिष्ट पार्टीके संसदीय दलके नेता खगराज भट्ट सरकारसे लानल बजेट अड्ढारात कोठामे बैठके सेटिङ करल बेथितिपूर्ण योजनाके विकृत पुलिन्दा रहल जिकिर करल रहिट ।
सत्ता साझेदार दल नेकपा (एमाले) के प्रमुख सचेतक चक्रबहादुर मल्ल बजेटमे झोले, झिम्टे, चिम्टे ओ बिचौलिया विधाके प्रभाव रहल बटाइल रहिट ।
ओस्टके, नेपाली कांग्रेसके प्रदेश सभा सदस्य एवम् निवर्तमान आर्थिक मामिला राज्यमन्त्री प्रकाशबहादुर बम सरकारसे प्रस्तुत करल बजेटप्रति समर्थन जनैटी बजेटमे कुछ त्रुटि रहल बटाइल रहिट ।
छलफलके क्रममे उठल विषयमे जवाफ डेटी आर्थिक मामिलामन्त्री विक्रमसिंह धामी अर्थमन्त्रीके हैसियतसे बजेटके जिम्मा अपने लेना कहटी उहीहे आउर मजा बनाइक लाग सक्कु जनहनसे छलफल करे सेकजैना बटैलै ।
