धनगढी उपमहानगरसे एकीकृत भान्सा घर सञ्चालन
पहुरा समाचारदाता
धनगढी, २७ असार । धनगढी उपमहानगरपालिकासे सामुदायिक विद्यालयके बालबालिकाहे गुणस्तरीय तथा पोषणयुक्त दिवा खाजा उपलब्ध करैना उद्देश्यसे एकीकृत भान्साघर सञ्चालनमे लन्ले बा ।
सावन १ गतेसे वडा नम्बर १ से ८ सम रहल २१ सामुदायिक विद्यालयके करिब चार हजार विद्यार्थीहे इहे भान्साघरमे तयार करल खाजा वितरण कैना हुइल हो । उपमहानगरपालिकाके अनुसार ११ ठो आधारभूत ओ १० ठो माध्यमिक विद्यालयमे बालविकास कक्षासे कक्षा ५ सम अध्ययनरत तीन हजार ७९५ विद्यार्थीहे नियमित रूपमे दिवा खाजा प्राप्त कैना बटै ।
वडा नम्बर १ स्थित सरस्वती आधारभूत विद्यालय, शान्तिनगरमे भर कक्षा ८ सम अध्ययनरत सक्कु विद्यार्थीहे इहे भान्साघरसे खाजा उपलब्ध कराजैना बा ।
धनगढी–७ तिल्केचोकमे निर्माण करल एकीकृत भान्साघरके शनिच्चरके आयोजित कार्यक्रममे वडा नम्बर ७ के अध्यक्ष मोति राना थारू उद्घाटन करल रहिट । कार्यक्रममे नगर प्रमुख गोपाल हमाल, प्रमुख प्रशासकीय अधिकृत जनकराज भट्ट, टमान वडाके अध्यक्ष, विद्यालयके प्रधानाध्यापक तथा सरोकारवालाके उपस्थिति रहल रहे ।
उपमहानगरपालिकासे ‘फुड फर लाइफ’ नामक गैरसरकारी संस्थासँग दुई बरसके ठेक्का सम्झौता कैके दिवा खाज वितरणके जिम्मेवारी डेहल हो । धनगढी उपमहानगरपालिकाके आन्तरिक स्रोत, विश्व खाद्य कार्यक्रम ओ नेपाल सरकारके सहयोगमे दुई करोड ४५ लाख ३३ हजार २९ रुपैयाँके लागतमे भान्साघर सञ्चालनमे लानल हो ।
नगर प्रमुख गोपाल हमालके अनुसार भान्साघरके पूर्वाधार निर्माणमे ६८ लाख ३२ हजार ८५० रुपैयाँ, भान्सा सामग्री खरिदमे १७ लाख ४७ हजार ३९९ रुपैयाँ, खाजा ढुवानीके लाग सवारी साधन खरिदमे ३७ लाख ७७ हजार ९९८ रुपैयाँ तथा विद्युत जडान ओ ट्रान्सफर्मर खरिदमे १३ लाख ९२ हजार ४४५ रुपैयाँ खर्च करल बा । साथे विश्व खाद्य कार्यक्रमसे करिब ८६ लाख रुपैयाँ बराबरके सामग्री सहयोग प्राप्त हुइल उहाँ जानकारी डेलै ।
नेपाल सरकारसे दिवा खाजा कार्यक्रमअन्तर्गत प्रति विद्यार्थी दैनिक २० रुपैयाँ उपलब्ध करैटी आइल बा । आर्थिक बरसके १८० दिनके लाग विनियोजित रकम उप–महानगरपालिकासे विद्यालयके खातामे पठाजैना बा कलेसे विद्यालयसे विद्यार्थी संख्याके आधारमे ‘फुड फर लाइफ’हे भुक्तानी कैना व्यवस्था करल बा ।
कार्यक्रममे ‘फुड फर लाइफ’के व्यवस्थापन प्रमुख चिरञ्जीवी दाहाल धनगढी उपमहानगरपालिकासँग सहकार्य करे पाइबर खुशी लागल बटैटी बालबालिकाहे स्वस्थ, सुरक्षित ओ पोषणयुक्त खाजा उपलब्ध करैना प्रतिबद्धता व्यक्त करल रहिट ।
धनगढी उपमहानगरपालिका इ बरस २१ विद्यालयसे सुरु करल एकीकृत दिवा खाजा कार्यक्रम आगामी बरसमे पालिकाभिट्टरके सक्कु सामुदायिक विद्यालयमे विस्तार कैना योजना रहल जनैले बा ।
