सुदूरपश्चिम प्रदेश स्तरीय वातावरणीय मानव अधिकार रक्षक सञ्जालके बैठक सम्पन्न

पहुरा समाचारदाता
धनगढी, ३१ असार । अनौपचारिक क्षेत्र सेवा केन्द्र (इन्सेक) सुद्ररपश्चिम प्रदेश कार्यालय, धनगढीके आयोजनामे सुदूरपश्चिम प्रदेश स्तरिय वातावरणीय मानव अधिकार रक्षक सञ्जालके बैठक बुधके रोज धनगढीमे सम्पन्न हुइल बा ।

सुदूरपश्चिम प्रदेश स्तरीय वातावरणीय मानव अधिकार रक्षक सञ्जालसे काम करटी रहेबेर सिकाई, भोगाईके समिक्षा ओ अनुभवके आदानप्रदान कैना उद्देश्यसे नियमित बैठकके आयोजना करल हो ।

इन्सेक प्रदेश संयोजक खडकराज जोशीसे वातावराणीय मानव अधिकार रक्षकहुकनके आ—आपन संस्थागत कार्य क्षेत्र हुइलेसेफे मानव अधिकारके सवालमे काम करेबेर टमान समस्या आई सेक्ना हुइल ओरसे सक्कु जाने, सक्कुहुनके सिकाई, अनुभव ओ समस्या साझा करेक लाग मानव अधिकार रक्षक सञ्जालके नियमित बैठकके आवश्यकता हुइल बटैलै ।

उहाँ प्रदेश सरकार ओ स्थानीय सरकारसे निर्माण करल अपाङ्गता हुइल व्यक्तिहुकनके लाग बनल कानुन, टमान घटनासे पीडित हुइल महिलाहुकनहे सुरक्षित आवास गृह निर्माण ओ एकल महिलाहुकनके सामाजिक सुरक्षाकोष तथा मानव अधिकारके ऐन कानुन कार्यान्वयनके अवस्थाके बारेमे प्रदेश सरकार, जिल्ला समन्वय समिति, नगरपालिका ओ गाउपालिका महासंघके प्रतिनिधिहुकनके ध्यानाकर्षण पत्र सहित डेलिकेशन जैना जोशी बटैलै ।

सुदूरपश्चिम प्रदेश स्तरीय वातावरणीय मानव अधिकार रक्षक सञ्जालके अध्यक्ष तथा गैरसरकारी संघसंस्थाके अध्यक्ष देवी प्रसाद खनाल मानव अधिकारके सवालमध्ये सुरक्षित वातावरणके अधिकार महत्वपुर्ण रहल ओरसे गौरीगंगा नगरपालिकास्थित राजीपुर जंगलमे जथाभावी फेकल फोहोरके कारण स्थानीय नागरिक ओ गैयागोरुनमे असर करल घटनाके अनुगमन करके उहे फोहार व्यवस्थापनके लाग सञ्जालसे गौरीगंगा नगरपालिकामे ध्यानाकर्षण पत्र बुझाइल बटैलै । उहाँ विश्व वातावरण दिवसके अवसरमे सञ्जालसे गौरीगंगा नगरपालिका ओ घोडाघोडी नगरपालिकाके तीन स्थानमे बृक्षरोपण समेत करल बटैलै ।

एडभोकेसी फोरम नेपालके संयोजक पुष्पविक्रम शाहीसे वातावण फोहारके कारण नागरिक तथा जनावरमे प्रत्यक्ष असर करलपाछे सार्वजनिक सरोकारके मुद्दामे आईपीएल करे सेक्ना ओ ओकर लाग ठोस प्रमाणके आवश्यकता पर्ना बटैलै ।

ओरेक नेपालके कैलालीके जिल्ला संयोजक गीता चौधरी हिंसा पीडित महिलाके न्याय ओ पुनस्र्थापनाके लाग स्थानीय सरकारसे नीति तथा कार्यक्रममे बजेट विनियोजन नैकरेबेर प्रभावितहुक्रे न्यायके लाग थप पीडा सहेपर्ना बाध्यता आइल बटैली । उहाँ वडाके योजना छनौटमे प्रकृया नैपुगाके योजना छनौट करेक लाग लक्षित समुदाय राज्यके नीति तथा कार्यक्रममे नैपारल गुनासो करलै ।
मानव अधिकारका लागि महिला एकल महिला समुहके सुदूरपश्चिम प्रदेश कार्यक्रम संयोजक वेद अवस्थीसे संघ सरकारके परिपत्र जारी हुके फे स्थानीय पालिकासे एकल महिलाके सामाजिक सुरक्षा कोष सम्बन्धी कार्यविधि बनैना चासो नैडेहल बटैलै ।
नरदिप धामी अपाङ्गता सम्बन्धी ऐन निर्माण हुसेक्लेसेफे प्रभावकारी कार्यान्वयन नैहुके अपाङ्गता हुइल व्यक्ति टमान सेवासुविधासे वञ्चित हुई परल बटैलै ।