एमालेसँगे सत्ता सहकार्य अन्त्य कैना निर्णयपाछे लुम्बिनीमे कांग्रेसके आकस्मिक बैठक

पहुरा समाचारदाता
बुटवल, ३२ असार । नेपाली कांग्रेससे सात प्रदेशमे नेकपा एमालेसँगेके सत्ता सहकार्य अन्त्य कैना केन्द्रीय निर्णय करल सँगे लुम्बिनी प्रदेशमेफे राजनीतिक गतिविधि तीव्र बनल बा ।

एमाले नेतृत्वके लुम्बिनी प्रदेश सरकारमे सहभागी कांग्रेसके मन्त्रीहुकनसँगे छलफल कैना कांग्रेस संसदीय दलके नेता डिल्लीबहादुर चौधरीसे आज दोप्हर ३ बजे दाङमे बैठक बोलाइल बटै । बैठकमे सरकार सहभागी मन्त्री, प्रमुख सचेतक ओ सचेतक सहभागी हुइल बटै ।

केन्द्रसे एमालेसँगेके सत्ता सहकार्य अन्त्य कैना निर्णय करलपाछे लुम्बिनी प्रदेशमेफे सरकारके भविष्य ओ लावा सत्ता समीकरणबारे राजनीतिक वृत्तमे चासो बह्रल बा ।

अब्बे कांग्रेससे प्रदेश सरकारसे अपन मन्त्री फिर्ता बोलैना ओ लाँवा राजनीतिक समीकरणमार्फत आघे बहै्रना कहटी, निर्णय आजके छलफलपाछे थप स्पष्ट हुइना अपेक्षा करल बा ।