जिप दुर्घटनामे २ जानेक मृत्यू

पहुरा समाचारदाता
बाजुरा, ५ सावन । बाजुरा हिमाली गा.पा.५ क्युडी स्थित कुवाडी– क्युडी भिटर कच्ची सडक खण्डमे धुलाचौरसे दुधिला खोला ओर जैटी रहल सु.प.प्र.०१–००१ ज १४७८ नम्बरके जिप दुर्घटना हुइल रहे ।

सडकके उप्पर मोडसे करिव १० मिटर तरेक मोडमे गिरके जीपमे सवार जिल्ला बाजुरा, हिमाली गा.पा.२ बैठना बर्ष ४० के धर्मलाल बुढा ओ जिल्ला हुम्ला, ताजाकोट गा.पा.५ बैना बर्ष ४० के अम्मर सिंह बुढाके मृत्यु सोम्मार साँझ हुइल बा ।

दुर्घटनामे गम्भीर घाहिल हुइल ओइनके कोल्टी आधारभुत अस्पताल बाजुरामे उपचारके क्रममे मृत्यु हुइल हो । साथे दुर्घटनामे घाहिल हुइल अन्य ७ जानेक कोल्टी आधारभुत अस्पताल बाजुरामे उपचार हुइटी रहल बा । दुर्घटना सम्बन्धमे प्रहरी आवश्यक अनुसन्धान करटी रहल बा ।