धनगढीमे कुवाँर २४ से शनिबारीय महिला उद्यम बजार सञ्चालन हुइना
पहुरा समाचारदाता
धनगढी, २४ सावन । धनगढी उपमहानगरपालिकासे अइना कुवाँर २४ गते शनिच्चरसे महिला उद्यम बजार सञ्चालन कैना जनैले बा । स्थानीय महिला उद्यमीसे उत्पादन करल वस्तु तथा सेवाके प्रवद्र्धन ओ बजारीकरण कैना उद्देश्यले शनिबारीय महिला उद्यम बजार सञ्चालन कैना हुइल हो ।
उपमहानगरपालिकाके रोजगार प्रवद्र्धन शाखासे जारी करल सूचनाअनुसार ‘महिलाहुकनके श्रमके सम्मान, आर्थिक सशक्तीकरणके अभियान’ कना मूल नाराके साथ सञ्चालन हुँइटी आइल शनिबारीय महिला उद्यम बजारहे आर्थिक वर्ष २०८३÷८४ मे समेत निरन्तरता डेना हुइल हो ।
उपमहानगरपालिकासे जारी करल सूचनामे बजारमे अपन उत्पादन तथा सेवाके प्रदर्शन, बिक्री तथा वितरण कैना इच्छुक स्थानीय महिला उद्यमीहे सावन २५ गतेसे भदौ २६ गतेसम कार्यालय समय भिटर आवेदन डेना आग्रह करल बा ।
इच्छुक महिला उद्यमीसे उपमहानगरपालिकाके रोजगार शाखामे सम्पर्क करके तोकल अवधिभिटर आवेदन फाराम करेपर्ना बा ।
उपमहानगरपालिकाके अनुसार शनिबारीय महिला उद्यम बजार धनगढीके जेन्जी मार्गमे सञ्चालन हुइना बा । बजार हरेक शनिच्चर दुपहर २ बजेसे साँझ ६ बजेसम सञ्चालन हुइना जनाइल बा ।
उपमहानगरपालिकासे महिला उद्यमीसे उत्पादन करल स्थानीय वस्तु तथा सेवाके बजार विस्तारसँगे महिलाके आर्थिक सशक्तीकरणमे समेत बजारसे योगदान पुग्न बटाइल बा ।
