जाईमे तीनदिने ‘हरेरी महोत्सव २०८३’ आयोजना हुइना
पहुरा समाचारदाता
धनगढी २५ सावन । थारू समुदायके महत्वपूर्ण सांस्कृतिक पर्व ‘हरेरी पूजा’के संरक्षण तथा प्रवद्र्धन कैना उद्देश्यसे धनगढीमे तीनदिने ‘हरेरी महोत्सव २०८३’ हुइना बा ।
हरेरी महोत्सव २०८३ मूल आयोजक समितिसे सोम्मार करल पत्रकार सम्मेलनके आयोजना कैके धनगढी उपमहानगरपालिका–५, जाईस्थित थारू देउथान (ठनुवा) मे भदौ ५ गतेसे ७ गतेसम महोत्सव सञ्चालन हुइना जनागिल बा । महोत्सव कैना आघे भदौ ४ गते बिहान ११ बजे हरेरी पुजा समेत कैना मुल आयोजक समितिके संयोजक कुलबिर चौधरी जानकारी डेलै ।
थारू समुदायसे सामूहिक रूपमे मनैटी आइल हरेरी पूजा पछिल्का १० वर्षसे महोत्सवके रूपमे आयोजना हुइटी आइल बा । यी वर्षफे तीन दिनसम टमान सांस्कृतिक कार्यक्रमसहित महोत्सव मनाई लागल हो । आयोजकके अनुसार हरेरी पूजा थारू समुदायके प्रमुख चार पूजामध्ये एक महत्वपूर्ण पूजा हो । हरेरी पूजापाछे किसानसे खेतबारीमे लगाइल बालीमे लग्ना रोगव्याधि हट्न ओ खेतीपाती मजा हुइना जनविश्वास रहटी आइल बा ।
हरेरी पूजा तथा महोत्सवसे थारू समुदायके मौलिक संस्कृति, परम्परा ओ पहिचान संरक्षणमे महत्वपूर्ण योगदान पुगैटी आइल आयोजकके कहाई बा । आधुनिकता ओ सांस्कृतिक अतिक्रमणके कारण लोप हुइना अवस्थामे रहल मौलिक परम्पराके संरक्षणके लाग स्थानीय, प्रदेश, राष्ट्रिय तथा अन्तर्राष्ट्रियस्तरमे यकर प्रचार–प्रसार आवश्यक रहल आयोजक समितिके सदस्य बिनय चौधरी जानकारी डेलै ।
हरेरी पूजाहे स्थानीयस्तरमे केल्ह सीमित नैधारके व्यापक रूपमे प्रचार–प्रसार तथा संरक्षण कैना महोत्सव आयोजना करल जाँई गाँउके थारु अगुवा धनबहादुर चौधरी बटैलै ।
