एक पुस्तासे डोसर पुस्तासम गुरही ओ सोटा बनैना कार्यशाला
पहुरा समाचारदाता
धनगढी, २९ सावन । कैलालीके कैलारी गाउँपालिकामे एक पुस्तासे डोसर पुस्तासम गुरही ओ सोटा बनैना कार्यशाला निम्जल बा ।
शुकके रोज गोहिनके फाउण्डेसन कैलालीके आयोजना ओ कैलारी गाउँपालिकाको कार्यालयके सहयोगमे विद्यालयमे पह्रना लउण्डा लउण्डीहुकनहे गुरही ओ सोटा बनैना तालिम डेहल हो ।
पुरान पुस्ताके ज्ञान सीप लौवा पुस्तामे सारेक लाग फाउण्डेसनसे गुरही ओ सोटा बनैना तालिम डेहल हो । तालिम उदघाटनके प्रमुख अतिथि कैलारी गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे सम्बोधन करटी उहाँ पहिलेक पुस्ताके ज्ञानसीप लौवा पुस्तामे हस्तान्तरण हुई नैसेकलपाछे हमार कला, संस्कृति लोप हुइटी बटैली ।
फाउण्डेसनके आयोजनामे मजा कार्यक्रमके आयोजना करल बा । कला, संस्कृतिहे संरक्षण कैना एक ठो उपाय यूवामे पौराणिक ज्ञानसीप हस्तान्तरण कैना रहल उहाँ जनैली । लौवा पुस्तामे ज्ञानसीप नैहुके बजारके किन्के काम चलैना करल बटै, मने आपनमे उ सीप रहलेसे औरक भर नैपरेपरी उहाँ कहली ।
कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल थारु समुदाय गुरही टिहुवार पुस्तौसे मनैटी आइल ओरसे यूवा पुस्ताफे छोरे नैहुइना बटैलै । पर्व मनाइक लाग चाहल सामाग्री बनाई सिखैना मजा कार्य रहल उहाँ बटैलै ।
कार्यक्रमके संचालन तथा उद्देश्यबारे जानकारी फाउण्डेसनके सचिव कविता चौधरी डेहल रहिट । फाउण्डेसनसे थारु समुदायके कला, संस्कृति संरक्षण सम्बन्धी कार्य कैना कहिके स्थापना हुइल उहाँ जनैली । उ तालिममे पाका उमेरके सुख्ली चौधरी, रेखा चौधरी, हरि चौधरीलगायतसे गुरही ओ सोेटा बनैना तालिम डेले बटै ।
