विपतपुर–मिलनपुर सँघुवा विवाद मिलल

पहुरा समाचारदाता
धनगढी, ३० सावन । अक्के समुदाय, अक्के वर्ग, गाँस, वास ओ कपासके लाग राज्यसे माग कैटी संगसंग्गे रातदिन बर्षौसे आन्दोलन करटी रहल समुदाय हुइट मिलनपुर ओ विपतपुरके मुक्तकमैयाबासी । राज्यसे पाईपर्ना अधिकार पूर्ण रुपमे नैपाइलपाछे उहाँहुक्रे अधिकारके लाग अभिनसम आन्दोलन जारी रख्ले बटै । राज्य पाईपर्ना अधिकारबाहेक गाउँघरमे एक ठो छोटमोट विवादसे एक गाउँक मनैनहे दुसर गाउँक मनै हेरे नैसेक्ना अवस्था रहे ।

उ चाही गाउँक दखिन पर्ना मोहना लडियामे डर्ना संघुवा नाँघना ओ वहाँसम जाईक लाग चाहल डगरके विवाद केल्ह हो । उ विवाद उ समुदाय वर्गहुकनके बर्षौसे आन्दोलन करल मागमेफे नैपरठ ।

कैलालीके कैलारी गाउँपालिका वडा नम्बर ७ मिलनपुर ओ विपतपुर मुक्तकमैया बस्ती जोरल बा । संग संगे आन्दोलन कैटी संगे बैठल बस्तीफे हो । दुनु गाउँक घरेक अंगना जोरल बा । दुई गाउँ छुटयाइक लाग खाली एक ठो सडक केल्ह बा । सायद लौवा मनै उ गाउँमे जैही कलेसे गाउँ छुटयाइनाफे कर्रा हुई सेकठ ।

विवाद भर मोहना लडिया नाघेक लाग डारल संघुवा नाघे जैना डगर ओ नाघे पाई पर्ना कना केल्ह हो । दुनु गाउँक मनै उ संघुवा नाँघके दुनु गाउँक मनै खेती पाटी ओ सामान लेहे जैना करल बटै । डगरके विषयमे हुइल विवाद दुनु गाउँक विचा भारी द्वन्द बह्रटी रहे । विवाद समाधानके लाग प्राकृतिक स्रोत द्वन्द रुपापन्तरण केन्द्र नेपालके सहजीकरण, कैलारी गाउँपालिकाके न्यायिक समितिके आयोजना, वडा नम्बर ७ के कार्यालयके समन्वयमे द्वन्द रुपान्तरण प्रक्रिया अनुसार माकुराके सहजीकरणमे विवाद मिलल बा ।

महिनौसे सृर्जित विवाद शुकके रोज मिल्के डुनु गाउँक मनै मिल्के जैना सहमति करलपाछे ढेर दिनमे मनमुटावा ओ आपसी द्वन्द खुशीमे परिणत हुके दुनु गाउँक मनैनके मुहारमे हाँसी डेखल बा ।

विवाद दिगो रुपमे समाधानके लाग दुई गाँउ विच ११ बुँदे सहमति

१. विपतपुर गाउँके दखिन मोहना लडियामे हिउद महिनामे अइना जैना अस्थायी काठुक संघुवा निर्माण करेबेर विपतपुर ओ मिलनपुर गाउँक मनै मिल्के श्रमदान कैना सहमति करटी ।
२.काठुवक पुल बनाईबेर आवश्यक पर्ना खम्मा खुटा दुनु मिल्के व्यवस्थापन कैना सहमति करटी ।
३. सघुवा बनाईबेर आवश्यक पर्ना किला काँटी दुनु गाउँ ओ भल्मन्सा मिल्के वडा नम्बर ७ कार्यालय वा गाउँपालिकासंग माग कैना सहमति हुइल बा ।
४. दुनु गाउँ मिल्के अस्थायी पुल निर्माण हुइलपाछे मिलनपुर ओ विपतपुर गाउँक व्यक्तिहुक्रे निशुल्क प्रयोग करेपैना ओ और मनैनसे शुल्क लेना, विपतपुरके चौकीदारी कैना, उहीसे उठल रकम मोहना लडियासे कटान करल जमिनके कर तिर्ना सहमति हुइल बा ।
५. बर्खा लग्ना आघे दुनु गाउँक मनै मिलके संघुवा उखारके सुरक्षित ठाउँमे ढर्ना ।
६. यी सहमतिके सक्कु बुदाँ कुवाँर मसान्तसम कार्यान्वयन कैना ।
७. करल सहमति नेपाल सरकारके कानूनमे बाँझे गैलेसे उहे ऐन अनुसार कैना ।
८. सहमति कैलारी गाउँपालिकाके न्यायिक समिति संयोजक भगवतीकुमारी चौधरी ज्यूके रोहबारमे हुइना । सक्कु बुँदा पूर्ण रुपमे सहमति हुके परिपालन कैना, करैना करके राजीखुशीके साथ सहमति कैगिल बा ।
९. कौनो मेरिक विवाद उत्पन्न हुइलेसे माकुरा पद्धतीसे आपासी छलफलके माध्यमसे समस्याके समाधान कैना ।
१०. खेवुवाके चौराहासे सेम्राहुवा फटुवा जैना डगर पालिकाके नियम अनुसार खोल्न बा । उ डगर खोल्न क्रममे तारवारके व्यवस्थापन पालिकाके पहल कैना सहमति हुइल बा ।
११. वडा सदस्य दुनीराम चौधरीके संयोजकत्वमे कार्यान्वयन समिति ५ जाने रहना करके गठन कैना सहमति हुइल बा ।

विवाद दिगो समाधानसे आपसी सदभाव कायम हुइठः गाउँपालिका उपाध्यक्ष भगवती

कैलारी गाँउपालिका उपाध्यक्ष तथा न्यायिक समिति संयोजक भगवतकुमारी चौधरी कौनोफे ठाउँक विवाद दिगो रुपमे समाधान हुइलपाछे आपसी सदभाव बह्रना बटैले बटी ।
उहाँ कहली, वडा नम्बर ७ स्थित मिलनपुर ओ विपतपुरके मुक्त कमैया बस्तीमे अक्के समुदाय ओ अक्के वर्गमे बसोवास बा । मने छोट विवादसे भारी द्वन्द फैले सेकठ । सामाजिक द्वन्द मजा नैहो, मन मिल्ना जरुरी बा ।

विवाद करटी करटी गैलेसे पुस्तासम विवाद बह्रटी जाइठ । उहीसे दुनु पक्षहे नोक्सान करठ । विकासके बाधक बनाठ । कुछ दिनसे दुनु बस्ती विच विवाद रहे आज समाधान हुइल बा । दुनु गाउँ मिल्लके विकासके आघे बह्रे सेक्जाई ओ आपन पुरान अधिकारके संगसंगे जाई सेक्जाई ।

उहाँ मिलनपुर ओ विपतपुरके जस्टे और ठाउँमे विवाद हुइल मने मिल्के गैल बटैली ।

दुनु गाउँक भल्मन्सासे सहमति पत्र साटासाट

विपतपुरके भल्मन्सा दाउराम चौधरी ओ मिलनपुरके भल्मन्सा भागीराम चौधरी ११ बुँदे सहमति पत्र एक दुसरसे साटासाट करके आपससे मिलके जैना प्रतिवद्धता व्यक्त करले बटै । उ संगे दुनु गाउँक मनै ठोप्री बजाके खुशी साटिक साट करल रहिट ।

दुनु बस्ती विच साझा विकल्प पारितके लाग संयुत्त, बैठक

विवाद समाधानके लाग प्राकृतिक स्रोत द्वन्द रुपापन्तरण केन्द्र नेपालके सहजीकरण, कैलारी गाउँपालिकाके न्यायिक समितिके आयोजना, वडा नम्बर ७ के कार्यालयके समन्वयमे द्वन्द रुपान्तरण प्रक्रिया अनुसार माकुराके सहजीकरणमे दुनु बस्ती विच साझा विकल्प पारितके लाग संयुत्त, बैठक सम्पन्न हुइल बा ।

“दिगो शान्तिके लाग उन्नत सम्बन्ध” कना मूल नाराके साथ साझा विकल्प पारित करेक लाग संयुक्त बैठक तथा खाट विधि सम्पन्न हुइल हो ।
वडा सदस्य तथा माकुरा समूहके सदस्य टुनीराम चौधरीके सभाध्यक्षतामे सम्पन्न कार्यक्रममे कैलारी गाउँपालिका न्यायिक समिति संयोजक भगवती कुमारी चौधरी प्रमुख अतिथिके रूपमे उपस्थित रहिट ।

कार्यक्रमके उद्देश्य तथा विषयवस्तुबारे प्राकृतिक स्रोत द्वन्द रुपान्तरण केन्द्र कैलालीके स्रोत व्यक्ति श्री गंगा दुलाल जानकारी कराइल रहिट । कार्यक्रममे केन्द्रके पश्चिम क्षेत्रीय संयोजक बल्लु चौधरी विवादसे भलो नैहुइना बल्की दुनु बस्तीहे घाटा हुइना बाट बत्वाइल रहिट । कार्यक्रमके सहजीकरण बन्धु प्रसाद चौधरी करल रहिट । स्वागत मन्तव्य माकुरा समूहके सदस्य दोङ्गली चौधरी ओ सञ्चालन माकुरा समूहके सदस्य रमिता चौधरी करल रहिट । स्थानीयस्तरमे डेखल विवाद तथा द्वन्द्वहे संवाद, सहकार्य ओ आपसी समझदारीमार्फत समाधान करटी दिगो शान्ति ओ सुमधुर सम्बन्ध कायम कैना सहमति हुइल बा ।

कार्यक्रममे अतिथिमे रूपमे विपतपुर गाउँक भल्मन्सा दाउराम चौधरी, मिलनपुर गाउँक भल्मन्सा भागीराम चौधरी, श्री बुटकहुवा प्रा.वि. विद्यालय व्यवस्थापन समितिके अध्यक्ष श्री कृष्णी चौधरी, प्राकृतिक स्रोत द्वन्द्व रूपान्तरण केन्द्र नेपाल पश्चिम क्षेत्रके क्षेत्रीय संयोजक बल्लु चौधरी, पहुरा दैनिकके सम्पादक प्रेम चौधरी लगायत टमान दुनु गाउँक स्थानीयबासीहुकनके उपस्थिति रहे ।