अमृता रानासहित १० जाने ब्युटिसियन अवार्ड–२०८३ से सम्मानित
पहुरा समाचारदाता
धनगढी, ७ भदौ । सौन्दर्य तथा ब्युटिसियन क्षेत्रमे नम्मा समयसे सक्रिय रहटी महिलाहे सीप, स्वरोजगार ओ आत्मनिर्भरताके डगरमे आघे बह्रैना योगदान पुगैटी आइल कञ्चनपुरके अमृता कुमारी राना ‘सेकेन्ड नेपाल ब्युटिसियन अवार्ड–२०८३’ से सम्मानित हुइल बटै ।
मंगलादेवी सिंह फाउन्डेसन ओ गंगबु ब्युटी पार्लर एण्ड ट्रेनिङ सेन्टरके संयुक्त आयोजनामे काठमाडौमे सम्पन्न हुइल अवार्ड कार्यक्रममे रानासहित देशके टमान जिल्लामे नम्मा समयसे सौन्दर्य क्षेत्रमे योगदान पुगैटी आइल १० जाने अनुभवी सौन्दर्यकर्मीहे सम्मान करल हो ।
रानाहे सौन्दर्य क्षेत्रमे पुगाइल दीर्घकालीन योगदान तथा महिलाहे स्वरोजगार ओ आत्मनिर्भर बनैना करल प्रयासके कदर करटी सम्मान करल सम्मानपत्रमे उल्लेख बा । सम्मानपत्रअनुसार उहाँ विगत दुई दशकसे नेपालमे सौन्दर्य क्षेत्रके विकास, बेरोजगार जनशक्तिहे रोजगारीके अवसर प्रदान तथा विशेष करके महिलाहे स्वरोजगार ओ आत्मनिर्भर बनैना महत्वपूर्ण योगदान पुगैटी आइल बटै ।
कञ्चनपुरके बेदकोट–सिसैयामे अमृता व्यूटि होम सञ्चालन करटी आइल राना सौन्दर्य सेवासंगे सीप तथा व्यावसायिक दक्षताके माध्यमसे महिलाहे आत्मनिर्भर बनैना क्षेत्रमे समेत काम करटी आइल बटै ।
काठमाडौंमे आयोजित अवार्ड कार्यक्रममे नेपालके पहिल कस्मोटोलोजिस्ट परीसी कारन्जित, विराटनगरके वरिष्ठ सौन्दर्यविद् सन्तोषी श्रेष्ठ, वीरगञ्जके गुड्डी जोशी, खगिसरा लामिछाने, मकवानपुर हेटौंडाके गमला राजभण्डारी, जनकपुरके लुसीदेवी शाह, बर्दियाके राधा कुँवर, कञ्चनपुरके अमृता कुमारी राना, सुदूरपश्चिमके निशा सिंह तथा सौन्दर्य कला व्यवसाय सङ्घ ललितपुर जिल्ला अध्यक्ष शारदा मुल्मीलगायत १० जाने सौन्दर्यकर्मी सम्मानित हुइल रहिट ।
कार्यक्रममे बागमती प्रदेशके निवर्तमान मन्त्री हरिप्रभा खड्की प्रमुख अतिथिके रूपमे सहभागी हुइल रहिट । उहाँ महिलाके वास्तविक सशक्तीकरणके लाग आर्थिक आत्मनिर्भरता आवश्यक रहल बटैटी सीप, स्वरोजगार ओ आर्थिक सशक्तीकरणमे सौन्दर्य क्षेत्रसे महत्वपूर्ण भूमिका खेल्टी रहल धारणा रख्ले रहिट ।
अमृता कुमारी राना यी सम्मान दुई दशक नम्मा सौन्दर्य यात्राके कदर केल्ह नैहुके महिलाहे सीप ओ रोजगारीमार्फत आत्मनिर्भर बनैना अभियानके सम्मानके रूपमे समेत लेसकल बटु कहिके बटैली ।
