२५ लाख ८६ हजारके सामानसहित ४ जाने पक्राउ
पहुरा समाचारदाता
धनगढी, ९ भदौ । कैलाली ओ कञ्चनपुरके टमान ठाउँसे २५ लाख ८६ हजार ७ सय ९६ रुपयाँ बराबरके सामान सहित चार जाने पक्राउ परल बटै ।
कैलालीके अलग अलग ठाउँसे अवैध रुपमे भारतसे भन्सार छलि करके ल्यानल अन्दाजी मूल्य रु.२ लाख ७८ हजार बराबरके साडी, बोईलर मुर्गि लगायतके सामान नियन्त्रण करले बा ।
सोम्मारके रोज जिल्ला प्रहरी कार्यालय कैलाली मातहत कार्यालयसे खटल प्रहरीसे बेवारिसे अवस्थामे फेला पारके नियन्त्रणमे लेहल बा ।
ओस्टेक, जिल्ला कञ्चनपुर भिमदत्त न.पा.१६ मझगाउसे अबैंध रुपमे भारतसे भन्सार छलि करके ल्यानल अन्दाजी मूल्य रु.९ लाख १२ हजार ५ सय ९६ रुपयाँ बराबरके IPHONE मोवाईल थान–५ सहित दोधरा चाँदनी न.पा.९ बैठना वर्ष २६ गौतम जोशीहे जिल्ला प्रहरी कार्यालय कञ्चनपुर समेतसे खटल प्रहरी टोलीसे सोम्मार साँझ फेला पारके उ IPHONE सहित उहाँहे नियन्त्रणमे लेहल बा ।
ओस्टेक करके, जिल्ला कञ्चनपुर बेलौरी न.पा.६ भुराकोटसे अबैंध रुपमे भारतसे भन्सार छलि करके ल्यानल अन्दाजी मूल्य रु.१३ लाख ९६ हजार २ सय बराबरके चिनी ९ वोरा, वाटरमेलन सिड्स (खर्भुजाके बिया ) २७ वोरा ओ साइकल थान–२ सहित भारत लखिमपुर कमलापुर बैठना वर्ष ३२ के शिवानन्द शर्मा, ऐ.ऐ. बैठना वर्ष ३० के वाहिद अली ओ जिल्ला कञ्चनपुर, बेलौरी न.पा.४ बैठना वर्ष २० के कैलाश जोशीहे इलाका प्रहरी कार्यालय बेलौरी, कञ्चनपुरसे खटल प्रहरी गिल रात फेला पारके उ सामान सहित उहाँहुकन तिन जानेहे नियन्त्रणमे लेहल बा ।
