मानव अधिकार रक्षक सञ्जालके बैठकसे रसुवा बाढ प्रभावितहुकन सहयोगके लाग आग्रह

धनगढी, ११ भदौ । प्रदेश स्तरीय मानव अधिकार रक्षक सञ्जालके बैठकसे बुधके रोज आइल विनाशकारी बाढसे प्रभावितहुकनहे टमान संघ संस्था ओ व्यक्तिगत रुपमे सहयोग कैना आग्रह कैगिल बा ।

सञ्जालके अध्यक्ष देवी खनालके अध्यक्षतामे विफेक रोज धनगढीमे बैठल बैठकसे टमान विषयमे छलफल कैटि उ बाढ प्रभावितहुकनहे सहयोगके लाग अपिल कैना निर्णय करल हो । इन्सेक प्रदेश संयोजक खडकराज जोशी बैठकहे सहजीकरण कैटी उ घटनासे जनधनमे भारी असर पारल कहटी सक्कु सक्कु संघ संस्था ओ व्यक्तिगत रुपमे सहयोग करेपर्ना बटैलै । उहाँ कहलै, उ घटनामे ढेर जाने ज्यान गुमैले बटै, अब्बे भौतिक क्षतिफे ओटरे ढेर हुइल बा । उ कल्पनासे ढेर हो । मुलुकहे यी घटनासे ढेर क्षति पुगल हो । यकर लाग जे जा सहयोग करेसेक्ही उ कैना जरुरी बा ।

सजालसे कैलालीमे सुरक्षित आवास गृह स्थापनाके लाग सामाजिक विकास मन्त्रीहे ज्ञापनपत्र बुझैना निर्णय करल बा ।

मानव अधिकार सम्बन्धी छैठौ राष्ट्रिय कार्ययोजना स्थानीयकरण करेक लाग प्रदेश स्तरीय मानव अधिकार रक्षक संजाल÷समुहके संस्थागत रुपमे शेयरिङ कैना निर्णय करल बा ।

जिल्ला समन्वय समितिके बैठकमे कार्ययोजनाबारे जानकारी करैना, बाढ प्रभावितहुकनहे सहयोग कैना संघ सस्था व्यक्तिहुनके आग्रह कैना तथा प्राप्त रकम एकद्वार प्रणालीसे सरकारहे हस्तान्तरण कैना निर्णय करल बा ।

ओस्टेक करके व्यवसाय ओ मानव अधिकार सम्बन्धी अन्तरक्रिया कार्यक्रम यिहे महिनामे कैना ओरसे यम्ने सहकार्य कैना संस्थाहे सहयोगके आहवान कैना निर्णय करल संजालके अध्यक्ष देवी खनाल जनैलै । कार्यक्रममे मानव अधिकारका लागि महिला एकल महिला समुहके प्रदेश कार्यक्रम अधिकृत वेद अवस्थी एकल महिला सुरक्षा कोष कार्यान्वयनके लाग आवाज उठाई बटैले रहिट ।

ओरेक कैलालीके संयोजक गीता चौधरी कैलालीमे सुरक्षित आवास गृह स्थापना करेपर्नामे जोड डेहल रहिट ।