कैलारी गाउँपालिकासे भोटेकोशी बाढ पीडितके लाग २ लाख रुप्या सहयोगके घोषणा
पहुरा समाचारदाता
धनगढी, ११ भदौ । कैलालीके कैलारी गाउँपालिकासे रसुवा जिल्लास्थित भोटेकोशी लडियामे आइल विनासकारी बाढके पीडितहुकनके लाग २ लाख रुप्या सहयोग उपलब्ध करैना निर्णय करले बा ।
गाउँपालिकाके अध्यक्ष राजसमझ चौधरी ओ प्रमुख प्रशासकीय अधिकृत दल बहादुर धामीसे हस्ताक्षरित विज्ञप्ति अनुसार, भदौ १० गते बिहान भोटेकोशी लडियामे बाढसे पुगाइल मानवीय तथा भौतिक क्षतिप्रति गाउँपालिकासे गहिर दुःख ओ स्तब्धता व्यक्त करले बा ।
गाउँपालिकासे बाढसे प्रभावित नागरिकहुकनके राहतके लाग गाउँपालिकासे प्रधानमन्त्री विपद् कोषमे रु. २ लाख जम्मा कैना निर्णय करल गाउँपालिका अध्यक्ष राजसमझ चौधरी बटैलै ।
कैलारी गाउँपालिकासे अलपत्र नागरिकके विवरण बुझाउन सार्वजनिक आह्वान
रसुवाके भोटेकोशी क्षेत्रमे आइल अकस्मात बाढके कारण कैलालीके कैलारी गाउँपालिका स्थायी ठेगाना रहल नागरिकफे प्रभावित ओ सम्पर्कविहीन हुइल बटै । गाउँपालिकासे एक अत्यन्त जरुरी सूचना जारी करटी बाढमे परके अलपत्र परल वा सम्पर्कविहीन हुइल स्थानीय नागरिकके विवरण उपलब्ध करैना सम्बन्धित परिवारजन तथा आफन्तहुकनमे अनुरोध करले बा ।
अध्यक्ष राज समझ चौधरीसे जारी सूचना अनुसार, आपन आफन्त सम्पर्कविहीन हुइलेसे लग्गेक वडा कार्यालय वा गाउँपालिकाके कार्यालयमे हाली जानकारी करैना कहल बा ।
