कैलाली बहुमुखी क्याम्पस ओ चैतन्य एकेडेमीबिच सहकार्य, १२० विद्यार्थी पैही लोकसेवा तयारीके अवसर

पहुरा समाचारदाता
धनगढी, १५ भदौ । कैलाली बहुमुखी क्याम्पस, धनगढी ओ चैतन्य एकेडेमी, धनगढीविच विद्यार्थीके शैक्षिक, व्यावसायिक तथा व्यक्तिगत विकासमे सहकार्य कैना समझदारी हुइल बा । विद्यार्थीहे प्रतिस्पर्धात्मक परीक्षाके तयारीके लाग अवसर उपलब्ध करैना, सीप तथा क्षमता विकास कैना ओ शैक्षिक क्षेत्रमे आपसी सहकार्य विस्तार कैना उद्देश्यसे दुई संस्थाबिच समझदारी पत्रमे हस्ताक्षर करल हो ।
वि.सं. २०८३ साल भदौ १५ गते सम्पन्न समझदारीअनुसार कैलाली बहुमुखी क्याम्पसके आर्थिक तथा शैक्षिक रूपमे आवश्यकतामे रहल जेहेन्दार तथा योग्य विद्यार्थीहे लक्षित करके लोकसेवा तयारी कक्षा सञ्चालन कैना बा ।
चैतन्य एकेडेमीसे आपसी सहमतिमे निर्धारण करल मापदण्डके आधारमे २० जाने विद्यार्थीहे निःशुल्क लोकसेवा तयारी कक्षा उपलब्ध करैना बा । ओस्टे, थप १०० जाने विद्यार्थीके लाग विशेष छात्रवृत्ति वा सहुलियतपूर्ण शुल्कमे तयारी कक्षा सञ्चालन कैना व्यवस्था करल बा ।
समझदारीसे विद्यार्थीके प्रतिस्पर्धात्मक क्षमता अभिवृद्धिहे मुख्य प्राथमिकतामे धारल बा । तयारी कक्षामार्फत विद्यार्थीहे आवश्यक शैक्षिक सहयोग, मार्गदर्शन तथा परामर्श उपलब्ध करैना उद्देश्य राखल बा । तयारी कक्षाके विषय, समय तालिका, अवधि ओ सञ्चालन विधि भर दुनु संस्थाके आपसी सहमतिमे निर्धारण कैना समझदारीमे उल्लेख बा ।
चैतन्य एकेडेमीसे उपलब्ध करैना सहयोग लोकसेवा तयारीमे केल्ह सीमित नैरही । समझदारीअनुसार लोकसेवा आयोग, शिक्षक सेवा आयोग, बैंक तथा वित्तीय संस्था, सार्वजनिक संस्थान तथा सार्वजनिक निकाय, सुरक्षा सेवा तथा अन्य सरकारी तथा गैरसरकारी प्रतिस्पर्धात्मक परीक्षाके लाग समेत तयारी, मार्गदर्शन ओ प्रशिक्षणसम्बन्धी सहयोग उपलब्ध कराई सेक्ना चैतन्य पाठशालाके अध्यक्ष गणेश प्रसाद जोशी बटैलै । विद्यार्थीके करियर तथा व्यावसायिक विकासमे योगदान पुग्न अन्य तालिम तथा कार्यक्रमसमेत सञ्चालन करेसेक्ना व्यवस्था करल समेत उहाँ बटैलै ।
ओस्टेक करके विद्यार्थीके शैक्षिक विकासके लाग दुनु संस्थासे संयुक्त रूपमे तालिम, कार्यशाला, गोष्ठी, अभिमुखीकरण कार्यक्रम, अतिथि व्याख्यान लगायतके कार्यक्रम सञ्चालन करे सेक्ही । चैतन्य एकेडेमीसे आवश्यकताअनुसार योग्य प्रशिक्षक, विषय विज्ञ, स्रोत व्यक्ति, अध्ययन सामग्री तथा शैक्षिक मार्गदर्शन उपलब्ध कराई कलेसे कैलाली बहुमुखी क्याम्पससे कार्यक्रम सञ्चालनके लाग आवश्यक स्थान, विद्यार्थी समन्वय तथा सूचना सम्प्रेषणमे सहयोग करी ।
दुनु संस्थाबिच अनुसन्धान तथा शैक्षिक क्षेत्रमे समेत सहकार्य कैना हुइल बा । अनुसन्धान गतिविधि, शैक्षिक परियोजना, ज्ञान आदान–प्रदान, नवप्रवर्तन तथा अनुसन्धानमे आधारित कार्यक्रम सञ्चालनमे आवश्यकता अनुसार सहकार्य कैना समझदारी हुइल बा । दुनु संस्थाके शिक्षक, प्राध्यापक, विषय विज्ञ तथा स्रोत व्यक्तिसे संयुक्त अनुसन्धान, तालिम, गोष्ठी तथा कार्यशालामे सहभागिता जनाई सेक्ही ।
समझदारी पत्र दुई वर्षके लाग लागू हुइना बा । आपसी लिखित सहमतिमे यकर अवधि नवीकरण वा थप करे सेक्ना व्यवस्था करल बा ।
समझदारी पत्रमे कैलाली बहुमुखी क्याम्पसके ओरसे क्याम्पस प्रमुख डा. लोकेन्द्रबहादुर बिस्ट ओ सह–प्राध्यापक डा. राजेन्द्रवीर चन्द तथा चैतन्य एकेडेमीके ओरसे प्रमुख कार्यकारी अधिकृत गणेशप्रसाद जोशी ओ प्राचार्य प्रेमनिधि ओझासे हस्ताक्षर करले बटै ।
दुनु संस्थाबिचके यी सहकार्यसे विशेष करके आर्थिक तथा शैक्षिक रूपमे आवश्यकतामे रहल विद्यार्थीहे प्रतिस्पर्धात्मक परीक्षाके तयारीमे पहुँच बह्रैना तथा ओइनके शैक्षिक, सीप ओ करियर विकासमे सहयोग पुगैना आधार तयार करल बा ।