कैलारीमे भूमिके वर्गीकरण हुइटि

पहुरा समाचारदाता
धनगढी, २६ भदौ । कैलाली जिल्लाके कैलारी गाउँपालिकामे भुमिके वर्गिकरण सम्बन्धी सरोकारवाला निकायके सुझाव संकलनके लाग छलफल कार्यक्रम सम्पन्न हुइल बा ।
कैलारी गाउँपालिकाके आयोजनामे कैलारीके भु–उपभोग योजना तर्जुमा तथा भु–उपयोग वर्गिकरणके (कित्ताके वर्गिकरण) प्रारम्भिक प्रतिवेदन प्राप्त हुइलमे सरोकार विच प्रस्तुत करके आवश्यक पृष्ठपोषणके आधारमे प्राप्त प्रतिवेदनमे संशोधन तथा परिमार्जन करके भुमि व्यवस्थापन प्रक्रियाहे सहज तथा व्यवस्थित बनाइक लाग सरोकारवालाहुकन वीच छलफल अन्तरक्रिया करके सरोकारवालाके सुझाव सकलन सम्बन्धी बैठक गाउँपालिका उपाध्यक्ष भगवतीकुमारी चौधरीके अध्यक्षतामे हुइल हो । कार्यक्रममे सम्बोधन करटी उहाँ कैलारी गाउँपालिकाके भुमिके वर्गिकरण हुइटी रहल ओरसे सक्कु जाने आपन भुमि कौन बर्गमे परटा कना हेर्ना ओ सच्याई पर्ना रहलेसे समयमे सच्यइना आग्रह करली । उहाँ कहली, अब्बे वेवस्ता करबी कलेसे पाछे गाह्रो हुइना कहटी सक्कु जाने हेरी ओ चित्ता नैबुझाल हो कलेसे हाली सच्याई ।

कैलारी गाउँपालिकाके प्रमुख प्रशासकीय अधिकृत दलबहादुर धामी गाउँपालिकासे भुमिके वर्गिकरण करटी रहल ओरसे सक्कु जाने आपन जग्गा कौन बर्गमे परल कना हेर्ना जरुरी रहल कहलै । उहाँ कहलै, अब्बे विचार नैकरवी कलेसे १५ बर्षसम पस्टाई ओ सच्याई परलेसे ढेर खर्च हुई ।
कार्यक्रममे इन्जिनियर सुनिल भण्डारी भु उपयोग योजना निर्माण तथा जग्गा वर्गिकरण सम्बन्धी प्रस्तुतीकरण करल रहिट । जग्गाके बर्गिकरण हुइल सहजे हेरक लाग एक ठो स्क्यान बनाइल ओ उ स्क्यान करके कित्ता नम्बर, सिट नम्बर डारके कौन जग्गा कौन बर्गमे परल जानकारी लेहे सेक्ना बटैलै ।
भूमिके वर्गिकरण करेबेर कृषि, आवासिय, व्यावसायिक, ओद्योगिक, खानी तथा खनिज, वन, लडिया, खोला, ताल, सिमसार, सार्वजनिक उपयोग, सांस्कृतिक तथा पुरातात्विक महत्व, अन्य क्षेत्र करके १० क्षेत्रमे वर्गिकरण करटी रहल उहाँ बटैलै । कार्यक्रममे कैलारी गाउँपालिकाके सामाजिक विकास शाखाके प्रमुख यगम कलेल सहजीकरण करल रहिट । कार्यक्रममे कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी, वडा नम्बर ४ के वडा अध्यक्ष ठागुराम चौधरी भुमिके वर्गिकरण करेबेर सुझाव लेना मजा रहल कहटी सक्कु जाने साथ ओ सपोट कैना जरुरी रहल बटैलै । कार्यक्रममे वडा अध्यक्षहुक्रे, वडा सदस्यहुक्रे, एक से नौ वडाके भल्मन्सा, तथा सरोकारवाला निकायके प्रतिनिधिहुकनके सहभागिता रहे ।