पोषण लेखाजोखा तथा व्यवस्थापनबारे अभिमुखीकरण

पहुरा समाचारदाता
धनगढी, २७ भदौ । कैलारी गाउँपालिकामे पोषण लेखाजोखा तथा व्यस्थापन कार्यक्रमके पालिका समन्वय, अभिमुखीकरण तथा तयारी बैठक सम्पन्न हुइल बा ।
कैलारी गाउँपालिकाके आयोजना ओ पोषणके क्षेत्रमे कार्यरत रहल संघसंस्था केयर, आइडिइ ओ याक नेपालके समन्वय सहकार्यमे पोषण लेखाजोखा तथा व्यस्थापन कार्यक्रमके पालिका समन्वय, अभिमुखीकरण तथा तयारी बैठक हो ।

कार्यक्रममे कैलारी गाउँपालिकाके प्रमुख प्रशासकीय अधिकृत दलबहादुर धामी खाद्यन्नके भण्डार रहल ठाउँमे पोषणके समस्या डेख्ना कना मिलाके खाई नैजन्ना बटैलै । उहाँ कहलै, यहाँ टे खाद्यन्नके भण्डार हो । प्राय सक्कु चिज यिहेसे उत्पादन हुइठ मने हम्रे पोषिलो खाना मिलाके खाई नैजानल ओरसे कुपोषण डेखल हो । कुपोषण टे पहाडके विकट ठाउँमे डेखा परेपर्ना हो, यहाँ नाई ।

काल्हके कर्णधार कना बालबालिका हुइट, उहाँ कहलै बालबालिकामे कुपोषित रहलेसे पाछेसम समस्या हुई ओइने मजा जनशक्तिके रुपमे आई नैसेक्ही । यम्ने स्थानीय तह, संघसंस्था लागके केल्ह नैहुई, कुपोषण सुधारके लाग सक्कु जाने ध्यान डेहे पर्ना जरुरी बा ।

कैलारी गाउँपालिकाके स्वास्थ्य शाखा प्रमुख नरेशकुमार चौधरी पहिचान हुइल कडा तथा मध्यम शिघ्र कुपोषण हुइल बालबालिकाहुकनहे समममे व्यवस्थापन तथा पोषण प्रणालीहे प्रभावकारी बनैना मेरिक लागल बटैलै ।

पोषण लेखाजोखा अभियानके प्रभावकारी कार्यान्वयनके लाग स्थानीय तहके तयारी, समन्वय तथा सरोकारवालाहुकनके सक्रिय सहभागिता सुदृढ कैना,
नेपाल सरकारके प्रोटोकल तथा पोषणसम्बन्धी सेवाके कार्यान्वयनबारे साझा बुझाइ विकास कैना, पोषण लेखाजोखा अभियान सञ्चालनके लाग स्पष्ट कार्ययोजना तथा कार्यविधिमे सहमति कायम कैना उद्देश्यसे आघे बह्रल उहाँ बटैलै ।

याक नेपालके स्वास्थ्य तथा पोपण अधिकृत रुची रानामगर कैलारीके कैलारीमे पोषण सुधारके लाग सन २०२४ जुलाईसे २०२७ जुनसम पोषण परियोजना संचालन करके पोषण सम्बन्धी कार्यक्रम आघे बह्राइल बटैली ।

उहाँ पोषण लेखाजोखा तथा व्यवस्थापन कार्यक्रम सञ्चालनबारे स्वास्थ्य शाखाके नेतृत्वमे पालिका स्तरमे अभिमुखीकरण तथा समन्वय बैठक, पोषण लेखाजोखा तथा व्यवस्थापन कार्यक्रमके अधिकतम उपलब्धीके लाग आवश्यक थप प्रचार प्रसार मुलक कार्यक्रम संचालन कैना, पोषण लेखाजोखा तथा व्यवस्थापन कार्यक्रम तयारी, उचाई अनुसारके तौल (जेड स्कोर), सुवाइल तह, पाखराके मध्य भागके परिधिको मापन विधि (वयस्यक तथा बालबालिका)से समुदाय स्तरमे परीक्षणके पूर्नताजगी तथा तथ्यांक व्यवस्थापन, प्रमाणीकरण बारे स्वास्थ्य संस्था स्तरमे स्वास्थ्यकर्मी तथा महिला सामुदायिक स्वास्थ्य स्वंयमसेविकासंग गोष्ठी सञ्चालन कैना करल बटैली ।

पोषण लेखाजोखा तथा व्यवस्थापन कार्यक्रम सञ्चालन कैना स्वास्थ्यकर्मी ओ महिला सामुदायिक स्वास्थ्य स्वंयमसेविका परिचालन कैना करैना, समुदाय परिचालन मार्फत पहिचान हुइल बालबालिकाके तत्काल आवश्यक अभिलेखिकरण करके व्यवस्थापन कैना करल उहाँ बटैली ।

एकीकृत शिघ्र कुपोषण व्यवस्थापन कार्यक्रम निर्देशिका बमोजिम कुषोषणके सघनता ओ अन्य स्वास्थ्य जटिलताके आधारमे पोषण पुर्नःस्थापना गृह÷केन्द्र, वा बहिरंग उपचार केन्द्रमे (२४ घण्टा भिटर) सिफारिस कैना साथै स्वास्थ्यकर्मी मार्फत तत्काल आवश्यक सेवा डेना, स्वास्थ्य जटिलता नैहुइल कडा शीघ्र कुपोषण पहिचान हुके निको हुइल ओ पोषण पुर्नःस्थापना गृह÷केन्दमे भर्ना हुके सुधार हुइल बालबालिकाके प्रमाणीकरण हुइल पश्चात पूर्नलाभके लाग पोषण बगैंचा स्थापना कैना परिवारके सदस्यहुकनहे कृषि सामाग्री उपलब्ध करैना करल अधिकृत रुची रानामगर बटैली ।

मध्यम शीघ्र कुपोषण पहिचान हुइल बालबालिकाके लाग तोकल मात्रामे खाद्य तथा पुरक खाना वितरण कैना, उपयुक्त स्थानके छनोट करके वितरण कैना ओ खाद्य प्रर्दशनीमुलक कार्यक्रम सामुहिक रुपमे संचालन करटी आइल उहाँ बटैली ।

कार्यक्रम सम्पन्न हुइल पश्चात ओकर प्रभावकारिता, तथ्यांकके विश्लेषण ओ तथ्यांकके न्यायोचित प्रयोग (स्थानीय सरकार ओ सहयोगी निकाय समेतसे) साथे अल्पकालीन तथा दीर्घकालीन रुपमे सञ्चालन करेपर्ना क्रियाकलापके योजनाके लाग पालिका स्तरमे सर्वपक्षीय समिक्षा कार्यक्रम आयोजना करल बटैली ।
कार्यक्रममे स्वास्थ्य कार्यालय कैलालीके पोषण फोकल पर्सन रमा गिरी कैलालीके ढेर ठाउँमे कुपोषणके समस्या डेखल कहटी उहीहे कम करेक लाग सक्कु पक्षके बरबार भूमिका रहल बटैली ।

कैलारी गाउँपालिका सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरीके अध्यक्षतामे हुइल कार्यक्रम हुइल रहे । उहाँ गाउँपालिकासे स्वास्थ्य ओ शिक्षा ढेर बजेट लगानी करके बटैलै । कार्यक्रमके संचालन मनाउ आधारभुत स्वास्थ्य चौकीके प्रमुख कुसुम चौधरी करल रहिट ।
कार्यक्रममे वडा अध्यक्षहुक्रे, टमान शाखाके प्रमुखहुक्रे, गाउँपालिकाभिटरके स्वास्थ्य संस्थाके प्रमुखहुकनके सहभागिता रहे ।