रसुवा बाढमे वेपत्ता परिवारहे राहत वितरण
पहुरा समाचारदाता
धनगढी, ३१ भदौ । भदौ १० गतेके रसुवाके त्रिसुली बाढमे वेपत्ता हुइल कैलारीके दुई जानेक परिवारहे राहत सहयोग हस्तान्तरण करल बा । कैलाली जिल्लाके कैलारी गाउँपालिका वडा नम्बर ५ के समुदायसे उठाइल राहत सहयोग हस्तान्तरण कैगिल हो ।
समुदायसे उठाइल नगद ओ खाद्यन्न कैलारी पालिका–३ वडामुडाके वेपत्ता हुइल विश्वराज चौधरी ओ वडा नम्बर ६ सुर्मीके रोयल चौधरीके परिवारहे सहयोग करल हो । समुदायसे उठाइल नगद रु १ लाख २ हजार ८५ रुप्या ओ खाद्यन्न चाउर ५ कुन्टल ६७ किलो, धान २४ किलो, गोहु ४ कुन्टल ८५ किलो प्रति परिवारहे डेहल बा ।
रोयल चौधरीके डाई किरण चौधरी ओ विश्वराज चौधरीके डाई पुजा चौधरीहे राहत सहयोग हस्तान्तरण कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी जनैलै । वडा नम्बर ५ के समुदायसे अपन स्वच्छासे सहयोग करल नगद ओ जिन्सी वेपत्ता हुइल दुनु जानेक परिवारके बराबर बाँटके हस्तान्तरण करल हो ।
वडा नम्बर ३ मे राहत सहयोग हस्तान्तरण कार्यक्रममे वडा नम्बर ५ के अध्यक्ष विष्णु प्रसाद चौधरी, वडा नम्बर ३ कार्यवाहक वडा अध्यक्ष किसुनलाल चौधरी, वडा नम्बर ५ वडा सदस्य भागुदास चौधरी, मानबहादुर चौधरी, वडा नम्बर ५, वडा नम्बर ३ के भल्मन्साहुक्रे रहल रहिट । ओस्टेक करके वडा नम्बर ६ मे वडा नम्बर ६ के वडा अध्यक्ष प्रेमबहादुर चौधरीलगायतके उपस्थितिमे राहत हस्तान्तरण कैगिल हो ।
