अबैध लागुऔषध सहित तीन जाने पक्राउ
पहुरा समाचारदाता
कञ्चनपुर, १ कुँवार । कञ्चनपुर जिल्लाके भिमदत्त न.पा.५ बनखेत स्थित लागूऔषधके कारोवार हुइटी रहल कना गोप्य सुचनाके आधारमे अवैध लागूऔषध खैरो हिरोइन ११ ग्राम ४० मिलिग्राम सहित उहे न.पा.६ बैठना बर्ष ३० के हरिश प्रसाद जोशीहे पक्राउ करल बा ।
बुधके रोज दोप्हर जिल्ला प्रहरी कार्यालय कञ्चनपुर ओ लागूऔषध नियन्त्रण ब्युरो शाखा कार्यालय महेन्द्रनगर, कञ्चनपुरसे संयुक्त रुपमे खटलके प्रहरी टोली चेकजाँच करके उ पदार्थ फेला पारके पक्राउ करल बा ।
ओस्टेक करके, कञ्चनपुर जिल्लाके भिमदत्त न.पा.३ राजीपुर स्थित गोप्य सुचनाके आधारमे अवैध लागूऔषध खैरो हिरोइन १.३७ ग्राम सहित कैलाली जिल्लाके जोशीपुर गा.पा.१ घर हुइल हाल भिमदत्त न.पा.३ राजीपुर डेरा करके बैठल वर्ष २२ के सुदिप चौधरीहे पक्राउ करल बा ।
बुधके रोज दोप्हर अस्थायी प्रहरी पोष्ट गैलनदी, कञ्चनपुरसे खटल प्रहरी टोली चेकजाँच करके उ पदार्थ फेला पारके पक्राउ करल बा ।
ओस्टेक करके, कञ्चनपुर जिल्लाके बेतकोट न.पा.६ सिसैयासे अवैध लागूऔषध खैरो हिरोइन १५० मिलिग्राम सहित उहे न.पा.१० हरपाल बैठना वर्ष २३ के मिन बहादुर ठगुन्नाहे पक्राउ करले बा ।
बुधके रोज साँझ प्रहरी चौकी सुडा, कञ्चनपुरसे खटल प्रहरी टोली शंका लाग चेकजाँच करके उ पदार्थ फेला पारके पक्राउ करल बा । इ सम्बन्धमे प्रहरी आवश्यक अनुसन्धान करटीरहल जनैले बा ।
