स्थानीय तहसे जिल्ला स्तरीय सेफ हाउस निर्माण ओ बजेट विनियोजन कैना प्रतिवद्धता

धनगढी, १३ कुवाँर । कैलालीमे जिल्ला स्तरीय सेफ हाउस ओ बजेट विनियोजनबारे स्थानीय तहके प्रमुख उपप्रमुख ओ विषयगत शाखाके प्रमुखहुकनसे छलफल कैगिल बा ।

एकद्वार संकट व्यवस्थापन केन्द्र (ओसिएमसी) कैलालीके लैगिक हिंसा व्यवस्थापन सल्लाहकार समिति एवं अन्य सरोकारबाला विचके समन्वय बैठक ओरेक कैलाली ओ दलित महिला अधिकार मञ्चके समन्वयमे जिल्ला समन्वय समिति कैलालीके प्रमुख टीकाकुमारी चौधरी भुलके अध्यक्षतामे हुइल हो ।

कार्यक्रममे जिसस प्रमुख जिल्ला स्तरीय सेफ हाउस आवश्यक रहल बटैली । उहाँ कहली, कैलालीमे १३ ठो स्थानीय तह बा, अलग अलग बनैलेसे ढेर खर्च ओ सुरक्षाके चुनौती बा । सक्कु पालिकासे सहयोग ओ समन्वय करलेसे जिल्ला स्तरीय सेफ हाउस बनाई सेक्जाई ।

सेफ हाउस निर्माणके जिल्ला सभासे पास हुके सक्कु पालिकाहे पत्रचार करल मने कहल अनुसार बजेट विनियोजन हुई नैसेक्ना विदम्वाना रहल बटैली । सक्कु पालिकासे एकवद्ध रुपमे आघे बह्रलेसे बनैना कौनोफे भारी बाट नैरहल उहाँ बटैली ।

गौरीगंगा नगरपालिकाके नगर प्रमुख देवीदत्त कँडेल पालिका स्तरीय बनाई खर्च धाने नैसेक्ना ओरसे जिल्ला स्तरीय बनैलेसे खर्च कम लग्ना ओ सुरक्षाके दृष्टिसे मजा रना बटैलै । सेफ हाउस निर्माणके लाग सक्कु पालिका प्रमुख मिल्के आघे बह्रना जरुरी रहल बटैलै ।

सुदूरपश्चिम प्रदेश सामाजिक विकास मन्त्रालयके सामाजिक विकास महाशाखाके शान्ति पन्त प्रदेशके कैलालीबाहेक आठ जिल्लामे अल्पकालित सेफ हाउस संचालनमे रहल ओ प्रदेश सरकारसे सहयोग करटी आइल बटैली । कञ्चनपुरमे प्रदेश स्तरीय सेफ हाउस निर्माण हुइटी कैलालीमे जिल्ला स्तरीय सेफ हाउसके लाग रु १ करोडके प्रस्ताव राखल बटैली ।

घोडाघोडी नगरपालिकाके नगर प्रमुख खडकबहादुर रावत जिल्ला स्तरीय सेफ हाउसहे सहयोग करेक लाग बजेट विनियोजन करसेकल बटैलै । उहाँ फोहोर व्यवस्थापनके लाग फोहोर व्यवस्थापन कैना ठाउँ नैरहलफे बटैल ।

भजनी नगरपालिकाके नगर प्रमुख केवल चौधरी जिल्ला स्तरीय सेफ हाउसके आवश्यकता रहल कहटी अपनेहुक्रे जटरा सेक्ना ओटरा सहयोग कैना प्रतिवद्धता जनैलै । उहाँ कहली, सक्कु पालिकामे बनैलेसे सुरक्षाफे नैहुइना ओ खर्चफे ढेर हुइना उहाँ बटैलै ।

जोशीपुर गाउँपालिका अध्यक्ष चित्रबहादुर चौधरीफे आपन पालिकाके बजेट ढेर नैहुइलेसेफे जटरा सेक्ना ओटरे सहयोग कैना प्रतिवद्धता जनैलै ।

धनगढी उपमहानगरपालिकाके नगर उपप्रमुख कन्दकला कुमारी राना धनगढी उपमहानगरपालिकासे आपन महिला सेफ संचालन ल्यानल बटैली । उहाँ कहली, जिल्ला स्तरीय हुइलेसे झन मजा रही सक्कु जाने ओहे सहयोग कैना, हिंसा पीडितहुकनहे रख्नाफे सहजिल हुई ।

धनगढी उमहानगरपालिकासे संचालन करल सेफ हाउसमे टमान पालिकाके पीडितहुकन धारल बा । जिल्ला स्तरीय रहलेसे यहाँके केल्ह नाही कैलाली आइल ओ हिंसामे परल जौन जिल्ला ओ विदेशी नागरिकहुकनहे धारे सेक्ना नगर उप्रमुख राना बटैली ।

गोदावरी नगरपालिकाके नगर उपप्रमुख शारदा देवी रोकाया अपनेहुक्रे हिंसामे परल महिलाहुकनहे सहयोग करटी आइल बटैली । उहाँ कहली, नगरपालिकासे दृष्टि फाउण्डेशनहे सहयोग करटी आइल बटी ।

जानकी गाउँपालिकाके उपाध्यक्ष लालमति कठरिया महिलाके लाग आवाज उठैटी आइल मने सुनुवाई नैहुइना बटैली । जिल्ला स्तरीय सेफ हाउसके आवश्यकता रहल कहटी अपनेक्रे सहयोग कैना तयार रहल प्रतिवद्धता जनैली ।

ओरेक कैलालीके जिल्ला संयोजक गीता चौधरी ओरेक नेपालसे हिंसामे टमान पालिकाके पीडितहुकनके न्यायिक सहयोग करटी आइल बटैली । सेफ हाउस संचालन करेबेर सबसे ढेर सुरक्षा चुनौती आइल बटैली ।

राष्ट्रिय मानव अधिकार आयोगके दैवज्ञराज न्यौपाने स्थानीय तहके विषयगत शाखाके नयाँ आइलबेला उहीहे फलो करके प्रमुख, उपप्रमुखहुकनहे जानकारी करैना बटैलै ।

कार्यक्रममे कैलालीके स्थानीय तहके महिला वालबालिका तथा जेष्ठ नागरिक शाखाके प्रमुखहुक्रे लैगिक हिसा निवारण कोष, बाल कोषाबारे जानकारी करैले रहिट । अधिकाँस पालिकामे उ कोष रह मने संचालन हुई नैसेकल बटैले बटै ।

कार्यक्रमके उद्देश्यबारे दलित महिला अधिकार मञ्चके अध्यक्ष सावित्रा घिमिरे जानकारी डेहल रहिट । संचालन जिल्ला समन्वय समिति कैलालीके विमल जोशी करल रहिट । छलफल कार्यक्रममे महिला तथा बालवालिकाके क्षेत्रमे काम कैना टमान संघसस्थाके प्रतिनिधिहुकनके सहभागिता रहे ।