दोधारा–चाँदनी झोलुङ्गे पुलके पिल्लर टुटके आवागमन अवरुद्ध

पहुरा समाचारदाता
कञ्चनपुर, १४ कुवाँर । कञ्चनपुरके महाकाली लडियामे रहल दोधारा–चाँदनी जोर्ना झोलुङ्गे पुलके एकठो पिल्लर टुटलपाछे आवागमन रुकल बा ।
जिल्ला प्रहरी कार्यालय कञ्चनपुरके प्रहरी नायब उपरीक्षक टेकबहादुर रावतके अनुसार सकारे पानीके बहावके कारण पुलके दोधारा ओरके पिल्लर टुटल हो । पिल्लर टुटलपाछे पुलके करिब पाँच–छ मिटर भाग उठल ओरसे आवतजावतमे समस्या हुइल बा ।
प्रहरी नायब उपरीक्षक रावत पुलमे आवागमन रोकल ओ सुरक्षाके लाग प्रहरी टोली परिचालन करल जानकारी डेलै । उहाँके अनुसार पुलके क्षतिग्रस्त भाग मर्मत करे पर्ना अवस्था रहल बा ।
भीमदत्त नगरपालिका–१३ के वडाध्यक्ष रामबहादुर बोहरा पानीके बहावके कारण सकारे पुलके पिल्लर टुटल बटैलै । उहाँके अनुसार पिल्लर टुटलपाछे पुलसे आवागमन पूर्ण रूपमे रुकल बा । प्राविधिक टोलीसे पुलके निरीक्षण कैना तयारी हुइटी रहल उहाँ जानकारी डेलै ।
करिब दुई दशकआघे निर्माण हुइल उक्त झोलुङ्गे पुल भीमदत्त नगरपालिका ओ दोधारा–चाँदनी नगरपालिकाहे जोर्टी आइल बा । पुल सञ्चालनमे आइलपाछे दोधारा–चाँदनी क्षेत्रके आवागमन सहज हुइनाके साथे मुलुकके मूलधारसँगके सम्पर्कसमेत सहज हुइल रहे ।