आप्रवासनसे हुइना जोखिम न्यूनिकरणमे जोड
पहुरा समाचारदाता
धनगढी, १४ कुवाँर । सुदूरपश्चिम प्रदेशके सामाजिक विकास समितिके सभापति धर्मराज पाठक आप्रवसानसे हुइना जोखिमहे न्यूनिकरण कैना जरुरी रहल बटैले बटै ।
निडस नेपालसे आयोजनामे सम्भावित यूवा श्रम अप्रावसान तथा सुदृद्ध जिविकोपार्जन परियोजना आलिताल गाउँपालिका डडेल्धुरा नेपाल भारतमुखी श्रम आप्रवासनके सवाल विषयक अन्तरक्रिया कार्यक्रममे उहाँ बाट बटवाइल रहिट ।
मनैनके इतिहास हेर्ना हो कलेसे एक ठाउँसे दुसर ठाउँ जैना हो, उहाँ कहलै, मनै जटरा ढेर जैठै ओटरे अनुभव हुइठ । एक ठाउँसे दुसर ठाउँ जैनाफे जरुरी बा । यहाँ भारतमे रोजगारीके सिलशिलामे जैना नेपाली जोखिममे परे नैपरल । जैना भारी बाट नैरहल मने जोखिममे परेफे नैपरल ।
नेपालके सन्दर्भमे हेर्ना हो कलेसे पहिले पहिले यहाँके सारा कामदार भारतिय रहिट । अब्बे थारु समुदाय बहुट आघे बह्रटी बा । काम कना कौनो छोटबर नैरहठ । यहाँके नेपाली बाहेर जाके जाफे काम करे सेक्ना मने आपन देशम लाज मन्ठै । बहुट जैसिन काम थारु समुदायके व्यक्ति आघे बह्रटी रहल समितिके सभापति पाठक बटैलै ।
कार्यक्रममे राष्ट्रिय मानव अधिकार आयोग सुदूरपश्चिम प्रदेशके उपसचिव प्रकाशराज भट्ट, प्रदेश नीति तथा योजना आयोगके सचिव गणेशबहादुर सिंहलगायत मन्तव्य राखल रहिट ।
कार्यक्रममे सुदूरपश्चिम विश्व विद्यालय तथा आप्रवासन विज्ञ डा. दिपकचन्द्र भट्ट भारतमुखी श्रम आप्रवासनके सवाल ओ सम्भावित सम्बोधनके उपायबारे प्रस्तुतीकरण करटी नेपालीहुक्रे भारतमे रोजगारीके जाईबेर विना कौनो योजनाके जैटी रहल बटैलै । भारत जउइयाके तथ्याङक नैहुइल मने २० से ३० लाख नेपाली भारतमे रोजगारीमे रहल बटैलै । नेपालीहुक्रे सबसे ढेर डिल्ली जैना करल बटैलै ।
निडस नेपालके सह कार्यकारी निर्देशक प्रकाश चन्द्र मडै निडस नेपालसे २०५५ सालमे स्थापना हुके ३÷४ प्रदेशमे काम करटी आइल बटैलै । उहाँ डेढ दशकसे श्रमिकके हक अधिकारके लाग काम करटी आइल बटैलै । २०६८ तथ्याङक हेरेबेर साढे ७ लाख नेपाली भारतमे गैल डेखल बा ।
कार्यक्रममे सहयोगी साझेदार एडब्लुओ इन्टरनेशनल नेपालके कुसुमकिशोर भटट्लगायत आपन बाट राखल रहिट । कार्यक्रममे ज्ञानेन्द्र शाह, गैर सरकारी संस्था महासंघ कैलालीके अध्यक्ष चेतमान साउद, सचितानन्द जोशीलगायत आपन बाट राखल रहिट । कार्यक्रम निडस नेपालके सचिव टिका थापा क्षेत्रीके अध्यक्षतामे हुइल रहे । कार्यक्रम संचालन निडस नेपालके निर्देशक विनोद कडारा करल रहिट ।
