हिंसा प्रभावित केन्द्रीत अवधारणाबारे छलफल

पहुरा समाचारदाता
धनगढी, १९ कुवाँर । कैलाली जिल्लाके कैलारी गाउँपालिकामे लैङिगतामे आधारित हुइना सक्कु मेरिक हिंसा ओ प्रभावित केन्द्रीत आवधारणाबारे सरोकारवालाहुकनहे छलफल कैगिल बा ।

डिसिएके सहयोगमे दलित महिला अधिकार मञ्च कैलालीके आयोजनामे रेसिस परियोजना अन्र्तगत लैङिगतामे आधारित हुइना सक्कु मेरिक हिंसा ओ प्रभावित केन्द्रीत आवधारणाबारे सरोकारवालाहुकनहे छलफल कैगिल हो ।

दलित महिला अधिकार मञ्चके अध्यक्ष सावित्रा घिमिरेके अध्यक्षतामे हुइल कार्यक्रममे कैलारी गाउँपालिका उपाध्यक्ष भगवतीकुमारी चौधरी प्रमुख अतिथि रहल रहिट ।
कार्यक्रममे सम्बोधन करटी उहाँ न्यायिक समितिमे दर्ता हुइल घटनाहे अब्बे डिजिटल रुपमे कम्प्युटरमे रख्ना करल बटैटी । उहाँ कहली, पहिले दर्ता हुइल घटनाके निवेदन पोका पारके रख्ना करल रहे । अब्बे कम्प्युटरमे ढारलपाछे कौन वडाके, का नाउँ टाइप कैटीकी खोज्न सहजुल हुइल बा ।

उहाँ दर्ता हुइल विवाद समाधनके लाग असल अभ्यासके सुरुवाट करल मने कतिपय घटनाके विपक्ष नैआइल कारण घटना समाधानमे ढिलाई हुइल बटैली ।
विवादके घटना दर्ता हुइलपाछे पालिकामे छलफल कैना प्रयास हुइटी बा, उपाध्यक्ष कहली, विवाद समाधानके लाग बोलाईबेर पक्ष विपक्ष समय नैअइना करलपाछे प्रहरी, भल्मन्सामार्फत समन्वय कैना करल बटी । न्यायिक समिति स्थानीयस्तरमे सहजुले विवाद मिलाईक लाग बनल हो । कौनो अददा अदालत नैहुके मन मिलैना मेरिक समाधानके प्रयास करल बटी ।

ंिहसा प्रभावित महिलाहुक्रे सामाजिक बन्धनमे बन्धल कारण घटनाहे बाहेर नाने नैसेकल उहाँ बटैली । जिहीहे घटना बह्रटी गैल बा ओकर लाग सचेतनामुलक कार्यक्रम संचालन कैना जरुरी बा ।

न्यायिक समितिसे विवाद समाधान करेबेर परिवार विग्रनासे बाँचल उहाँ बटैली । न्यायिक समितिमे बजेटके अभाव, कानूनी अधिकृत, इजलास कक्ष व्यवस्थित नैहुके समाधान कैना गाह्रो हुइलफे उपाध्यक्ष बटैली ।

कौनोफे महिला हिंसामे परल बटै कलेसे समन्वय करके आघे बह्रना जरुरी रहलफे उहाँ बटैली ।

कार्यक्रममे सहजीकरण करटी मञ्चके अध्यक्ष सावित्रा घिमिरे घरेलु ंिहसा सजय कसुर ऐन २०६६ मे विवादहे मेलमिलाप करे सेक्ना व्यवस्था रहल बटैली । न्यायिक समितिहे विवाद मिलाई सेक्ना अधिकारमे पर्ना मने छोरपत्रके डेना अवस्था अइलेसे अदालतमे जैही पर्ना उहाँ बटैली ।

घटनाके दिगो समाधानके लाग ढेर ग्याप बा, पीडित पक्षसे न्याय पैना ठाउँ पटा नैहो, न्यायिक समितिमे दर्ता कैना, जिल्लामे ओसिएमसीमार्फत जैना बाट पटा नैहुइना करल बा ।

स्थानीय कृष्णा चौधरी पीडितहुक्रे न्याय पैना, सहयोग पैना बाट मजासे पटा नैपैना करल बटैली । कलेसे महिला, बालबालिका तथा जेष्ठ नागरिक शाखाके प्रमुख बालकुमारी चौधरी पीडितहुकनहे समन्वय करटी करटी एक जानेक हकमे पैसा निकारल मने नैआइल बटैली ।

कार्यक्रममे दलित महिला अधिकार मञ्चके कार्यक्रम व्यवस्थापक सृजना पराजुली हिंसामे परल महिलाहुकनहे न्याय प्रदान सिलसिलामे हुइना समस्या, ग्यापहे दुर कराइक लाग सरोकारवालासे छलफल कराइल बटैली । कार्यक्रममे हिंसामे परल महिलाहुकनहे प्रदान कैना सेवा, चुनौती ओ असल अभ्यासबारे समुहगत रुपमे छलफल कैगिल रहे । कार्यक्रमके संचालन मञ्चके सहजकर्ता सिमा महतो करल रही ।