हरिप्रिया–प्रकाश फाउण्डेशनसे सञ्चारकर्मीहे स्वास्थ्य तथा सौन्दर्य सामग्री प्रदान

पहुरा समाचारदाता
धनगढी,१५ असार । हरिप्रिया–प्रकाश फाउण्डेशनसे असार १५ गते धान दिवसके पूर्व सन्ध्यामे अँटवारके रोज सञ्चारकर्मीनहे स्वास्थ्य तथा सौन्दर्य सामग्री प्रदान करले बा ।
फाउण्डेसनके सञ्चालक तथा नेपाली कांग्रेसके युवा नेता क्षितिज भण्डारी नेपाल पत्रकार महासंघ कैलाली शाखाके भवनमे स्वास्थ ओ सौन्दर्य सामाग्री वितरण करल हुइट । पत्रकार महासंघके अध्यक्ष जगत साउदके सभापतित्वमे हुइल कार्यक्रममे कोरोनासे ज्यानके जोखिम मोलके फ्रन्टलाईनमे काम करटी रहल ८ सञ्चारकर्मीहे पिपिई, फेस सिल्ड, सेनेटाईजर सहित सम्मान करल युवा नेता क्षितिज भण्डारी बटैलै ।

हरिप्रिया फाउन्डेसनसे १० हजार नागरिकके अनुहारमे मुस्कान नानेक लाग स्वास्थ्य सामाग्री सहित सौन्दर्य सामाग्री ओ जुस धारके मायाके कोसेली वितरण करटी आइल नेपाली काँग्रेस कैलाली जिल्ला सदस्य तथा युवा नेता नृप सुनार बटैलै ।
फाउन्डेसनसे कौनो आर्थिक संकलन नइकरके सामाजिक सेवाभावसे नेपाली तथा विदेशी नागरिक, पत्रकार सहित १० हजार अनाथ, असहाय, विपन्न, दलित ओ विशेषत काठमाडौमे अडकल सुदुरपश्चिम ओ कर्णाली प्रदेशके वालवालिकाहे लाखौंके राहत वितरण करल जनैले बा । फाउण्डेशनसे ४ बर्षके अवधीमे १६ से २० लाख रुपैयाँ समाजिक कार्यमे सहयोग करल युवा नेता भण्डारी बटैलै ।