आतिथ्य ओ स्वच्छता सम्बन्धी तालिम सुरु
पहुरा समाचरदाता
धनगढी, १२ असार । आतिथ्य ओ स्वच्छता सम्बन्धी तालिम सुरु हुइल बा । होटेल व्यवसायी महासंघसंगके समन्वय ओ होटेल व्यवसायी संघ कैलालीके सहकार्यमे नेपाल पर्यटन बोर्डसे तालिमके आयोजना करल हो ।
दुई दिनसम सञ्चालन हुइना तालिममे ४० जाने प्रशिक्षार्थी सहभागी बटै । तालिममे सहभागीहुकनहे सैद्धान्तिक ओ व्यवहारिक ज्ञान सिकाइसे होटेल व्यवसायी संघ कैलालीके अध्यक्ष केशवदत्त पाण्डेयसे जानकारी । छोट अवधिके तालिम हुइलेसे सहभागीहुकनहे कुछ न कुछ सिकाइ हुइना अपेक्षा करल उहाँ बटैलै ।
सेफसहित चार जाने प्रशिक्षकसे तालिमके सहजीकरण करटी रहल बटै । उद्घाटन कार्यक्रममे होटेल व्यवसायी महासंघके पर्यटन उपाध्यक्ष कलमबहादुर बम होटेल व्यवसाय क्षेत्र आर्थिक समृद्धिके मेरुदण्ड हुइल बटैलै । उहाँ होटेल क्षेत्रसे राज्यहे बर्षेनी भारी कर तिरनाके साथे ढेरहे रोजगारी डेहल बटैलै ।
‘सुदूरपश्चिमके प्राकृतिक सम्पदा ओ सांस्कृतिक विविधताके उपयोग करके होटेलसे आम्दानी करे सेक्बी’ उपाध्यक्ष बम कहलै । उहाँ तालिममे सिखल ज्ञान–सीपहे व्यवहारमे उतार्न तालिमके सहभागीहुकनहे आग्रह करलै । आन्तरिक राजस्व कार्यालय धनगढीके प्रमुख भीमप्रसाद काफ्ले करके टमान शीर्षकमे राज्यसे डेहल छुट सुविधा उपभोग कैना व्यवसायीहे आग्रह करलै । होटेल व्यवसाय सञ्चालन करेबेर कानुनके पालना कैना ओ श्रमिकके हकहितमेफे ध्यान डेना उहाँ आग्रह करलै । काफ्लेसे होटेल व्यवसायीहे लक्षित करके आन्तरिक रावस्व कार्यालय धनगढीसे करदाता शिक्षा कार्यक्रम सञ्चालन कैना तयारी करटी रहल जानकारी डेलै ।
