स्वास्थ्य केन्द्रके फार्मेसीमे ब्युटीपार्लर !

पहुरा समाचारदाता
उदासीपुर, १६ असार । कैलालीके एक स्वास्थ्य केन्द्रके फार्मेसीमे औषधि नाई, ब्युटीपार्लरके सामान मिलठ कलेसे नैपट्याइबी । मने जत्तिक हो ।
जिल्लाके कैलारी गाउँपालिका ८ स्थित उदासीपुर प्राथमिक स्वास्थ्य केन्द्रके फार्मेसीमे ब्युटीपार्लरके टिप्सके साथे सामान मिले लागल हो । उ स्वास्थ्य केन्द्र फार्मेसी बन्द करके एक व्यक्तिहे ब्युटीपार्लन सञ्चालन करे डेहलपाछे सञ्चालनमे आइल हो ।
स्वास्थ्य केन्द्रके प्रमुख रूपा बिक फार्मेसी हटाके फार्मेसी राखल भवनमे एक ब्यक्तिहे ब्युटीपार्लर पसल सञ्चालन करे डेहल बटैली । जनशक्ति अभावके कारण सञ्चालनमे रहल फार्मेसी बन्द हुइल बटैटी उहाँ उ फार्मेसी भवन खाली हुइलपाछे भाडामे ब्युटीपार्लर सञ्चालन करे डेहल स्थास्थ्य स्वास्थ्य केन्द्रके प्रमुख बिक जानकारी डेली ।
सञ्चालनमे रहल फार्मेसी बन्द हुइलपाछे सेवाग्राहीहुक्रे मारमे परल बाटै । स्वास्थ्य केन्द्रसे दैनिक करिब ५० जानेसे ढिउर जाने सेवा लेटी आइल विरामीहुक्रे मारमे परल बाटै । फार्मेसी बन्द हुइलपाछे उ स्वास्थ्य केन्द्र निजी क्लिनिकहे औषधी खरिदके लाग समझौता करल स्वास्थ्य केन्द्र प्रमुख बिक जानकारी डेली ।

जौन क्लिनिकसे सेवाग्राहीहुक्रे महंगोमे औषधी किन्न बाध्य हुइल बाटै । ओस्टके स्वास्थ्य वीमा कार्यक्रम सञ्चालन हुइटी आइल उ स्वास्थ्य केन्द्रमे उ कार्यक्रम प्रभावित हुइल बा । उ कार्यक्रम अन्तर्गत औषधि बिक्री वितरणके जिम्मा फेन उ क्लिनिकहे डेहल बटागिल बा ।
स्वास्थ्य केन्द्रके उ कामसे स्थानीयहुक्रे विरोध जनैटी आइल बाटै । स्थानीय युवा अजित चौधरी स्वास्थ्य केन्द्र सेवाग्राहीहुकन प्रभावकारी तथा सुलभ सेवा डेनाके साटो निजी क्षेत्रहे पोस्न काम करल बटैलै । स्वास्थ्य केन्द्रसे विरामीहुकनके स्वास्थ्य सम्बन्धी अधिकार कुण्ठित करटी रहल फेन स्थानीय अजित चौधरीके कहाइ बा ।
स्वास्थ्य केन्द्र पछिल्का ८ महिनासे फार्मेसी बन्द करके ब्युटीपार्लर सञ्चालन करे डेहल जनागिल बा । मासिक १५ सय रुपैया ब्युटीपार्लर सञ्चालकसे स्वास्थ्य केन्द्र भाडा असुली करटी आइल स्वास्थ्य केन्द्र व्यवस्थापन समितिके अध्यक्ष समेत रहल कैलारी गाउँपालिका वडा नंं ८ के वडा अध्यक्ष दुखीराम कठरिया बटैलै ।
अध्यक्ष कठरिया कहलै–‘फार्मेसी बन्द हुइलपाछे कुुछ आम्दानी होए कहिके ब्युटीपार्लर सञ्चालन करे डेहल हुइटी । आब फेरसे फार्मेसी सञ्चालनके पहल हुइटी रहल बा । सम्भवतः २ महिनाभित्रे सञ्चालन कर्र्ना तयारीमे बाटी ।’