एकल महिलाके लाग व्यावसायिक बेसार खेती सम्बन्धी तीन दिने तालिम सुरु

पहुरा समाचारदाता
धनगढी, १४ असार । गोदावरी नगरपालिकाके एकल महिलाहुकनके लाग तीन दिने तालिम शनिच्चरसे सुरु हुइल बा ।

शैलेश्वरी रिसर्च एण्ड कन्सल्टिङ प्रालिके आयोजना तथा गोदावरी नगरपालिकाके सहयोगमे गोदावरीके एकल महिलाहुकनहे उद्यमी बनाके आर्थिक रुपमे शसक्त बनैना बेसर खेती सम्बन्धी तालिमके आयोजना करल मानव अधिकारका लागि महिला एकल महिला समुहके प्रदेश कार्यक्रम अधिकृत वेद अवस्थी जनैली । तालिमके उदघाटन गोदावरी नगरपालिकाके नगर उप प्रमुख शारदादेबी रोकाया करल रहिट । उ अवसरमे सम्बोधन करटी उहाँ यी तालिम एकल महिलाहुकनके लाग महत्वपूर्ण ओ व्यावसाय बन्ना सहयोग पुग्न बटैलै ।

बेसार खेती तालिम लेके व्यावसाय सुरु करलेसे आर्थिक रुपमे शसक्त हुइना अवसर प्रदान हुइना उहाँ बटैलै । एकल महिलाहुक्रे समुह बनाके यी व्यावसायिक खेती सुरु करलेसे नगरपालिकासे थप सहयोग कैना प्रतिवद्धताफे जनैलै ।

गोदावरी नगरपालिका वडा नम्बर ३ के वडा अध्यक्ष चेतराज अवस्थी एकल महिलाहुकनके लाग यी तालिम सञ्चालन कर डेहलमे सहयोगी संस्था गोदावरी नगरपालिका परिवार ओ सहजीकरणमे सहयोग कैना मानवअधिकारका लागि महिला एकल महिला समुह कैलालीहे धन्यवाद डेलै । उहाँ कहलै, महिलाहुक्रे एकल हुइल दिनसे संघर्ष सुरु हुइना समाजसेफे फरक दृष्टिसे हेरटी रहल ओरसे आवसे एकल महिलाहुक्रे आत्मनिर्भर हुके आघे अइना जरुरी रहल बटैलै ।

मानव अधिकारका लागि महिला एकल महिला समुहके जिल्ला अध्यक्ष मनोदरी भण्डारीके अध्यक्षतामे हुइल कार्यक्रममे स्वागत मन्तव्य मनाव अधिकारका लागि महिला एकल महिला समुहके गोदावरी नगर सचिव जानकी बोहरा करल रहिट । तालिम संचालन समुहके प्रदेश कार्यक्रम अधिकृत वेद अवस्थी करल रहिट ।

कार्यक्रममे समुहके प्रदेश अध्यक्ष भगवती हमाल, गोदावरी नगरपालिकाके महिला बालबालिका तथा जेष्ठ नागरिक शाखाके प्रभा हमाल, कृषि शाखा प्रमुख प्रशिक्षक नन्दी मल्ल, हेमराज भट्ट ओ करुणा चन्द प्रशिक्षण डेहल रही । अत्तरियामे हुइटी रहल तालिममे गोदावरी नगपालिकाके वडा नम्बर २, ३, ५, १०, ११ के एकल महिलाहुकनके सहभागिता रहल रहे ।

ओस्टेक करके शनिच्चर गोदावरी नगरपालिका वडा नम्बर ८ स्थित जमुना नगरमे फे एकल महिलाहुकनके लाग व्यावायिक तीन दिने बेसार खेती तालिम सुरु हुइल बा । मानव अधिकारका लागि महिला एकल महिला समुहके प्रदेश अध्यक्ष भगवती हमालके अध्यक्षतामे सुरु हुइल तालिममे प्रमुख अतिथि गोदावरी नगरपालिकाके नगर उप प्रमुख शारदा देवी रोकाया ओ विशिष्ट अतिथि गोदावरी नगरपालिका वडा नम्बर ७ के वडा अध्यक्ष कलापति साउद रहल रहिट ।

कार्यक्रमके उद्देश्यबारे समुहके प्रदेश कार्यक्रम अधिकृत वेद अवस्थी जानकारी कराइल रहिट । कार्यक्रमके संचालन समुहके तारा चौधरी करल रहिट । गोदावरी नगपालिकाके वडा नम्बर वडा नम्बर ४, ६, ७, ८, ९ एकल महिलाके सहभागी रहे ।