कष्टम हायारिङ सेन्टर उदघाटन, कृषिमे सहज हुइना विश्वास

पहुरा समाचारदाता
मसुरिया, १६ असार । कैलालीके, गौरीगंगा नगरपालिका ९ शंकरपुरमे कष्टम हायारिङ सेन्टरके उद्घघाटन करल बा । प्रधानमन्त्री कृषि आधुनिकिकरण परियोजनाके ५० प्रतिशत अनुदानमे धनवर्षा कृषि सहकारी संस्थासे स्थापना करले बा । सेन्टरके मंगरके गौरीगंगा नगरपालिकाके मेयर भीमबहादुर देउवा उद्वघाटन करलै ।
कृषिमे खण्डिकरणसे लागत बह्रे जाके उत्पादन समेत प्रभावित हुइटी रहल समयमे अत्याधुनिक उपकरणके प्रयोगसे कृषिहे सहज ओ कम लगानीमे अधिक लाभ लेना सहयोग पुग्न सेन्टरके उदघाटन् करटी मेयर देउवा बटैलै । चक्लाबन्दी खेती कैना सेन्टरसे प्रयोगमे अइना उपकरणके उपयोगी हुइना कहटी देउवा नगरपालिकासेफे कृषिमे प्रविधिक बिउबिजनके सहयोग कैना प्रतिवद्धता जनैलै ।

कृषिके आधुनिकिकरण ओ यान्त्रिककरण कैना कृषि उपकरणमे अनुदान डेहल परियोजना कार्यान्वयन इकाई कैलालीके वरिष्ठ कृषि अधिकृत महान्नद जोशी जानकारी डेलै । सुपरजोन संचालक समितिके संयोजक रमेश चौधरी सेन्टरमे रहल कृषि यन्त्रके प्रयोगमे किसानसे बजार मूल्यसे सहज ओ सहुलियत २० प्रतिशत कम दर रेटमे सेवा सुविधा पैना बटैलै ।
परियोजना कार्यान्वयन इकाई कैलालीके १४ लाख ६१ हजार ५ सय रूप्या ओ सहकारीके १८ लाख ७५ हजार ५ सय करके ३३ लाख ३७ हजारके कुल लागानीमे कष्टम हायारिङ सेन्टर स्थापना करल बा । हायारिङ सेन्टरमे ट्याक्टर, धान थ्रेसर, गहुँ थ्रेसर, रोटाभेटर, डिस्क हयारो, मेडा बनैना, पावर टिलर, लेजर लैण्ड लेभलर, सिडड्रिल ओ हयापी सिडर करके ११ थान कृषि यान्त्रिक उपकरण रहल बाटै ।