जुवा खेल्टी रहल ७ जाने पक्राउ

पहुरा समाचारदाता
धनगढी, १७ असार । कैलाली लम्कीचुहा नगरपालिका वडा नं. ६ स्थित चोरीपुर खोलाके किनारमे रहल पुरान मुरगीनके खोरमे जुवा खेल्टी रहल अवस्थामे सात जाने पक्राउ परल बाटै ।
जुवा खेल्टी रहल कना विशेष सूचनाके आधारमे क्षेत्रीय अनुसन्धान समुह ओ ईलाका प्रहरी कार्यालय लम्कीसे खटल प्रहरी टोली ओइनहे पक्राउ करल रहे । पक्राउ परलमे कैलालीके लम्कीचुहा नगरपालिका वडा नं. ४ बैठना बर्ष ४३ के दिपक भण्डारी, बर्ष २८ के प्रकाश शाही, बर्ष ३२ को प्रजिन राई, बर्ष ३४ के कृष्ण बिष्ट, बर्ष ४० के नवल बुढा, बर्ष ३९ के नर बहादुर शाही ओ टिकापुर नगरपालिका १ बैठना बर्ष ३० के प्रकाश खडका रहल बाटै । जुवा खेल्टी रहल ओइन थेनसे नगद दुइलाख उन्नसाठी हजार सात सय रुप्या, तासके गडडी थान ३, कम्मल थान २ ओ मोबाइल थान ८ सहित बरामद करके अनुसन्धान हुइटी रहल जिल्ला प्रहरी कार्यालय कैलालीके प्रवक्ता प्रतिक विष्ट जनैलै ।