पत्रकार खड्काके निधन हुइल पुष्टि

नेपाल प्रेस युनियन जिल्ला शाखा कैलाली मृतक पत्रकार तेजबहादुर खड्काके निधन हुइल घटनाके सत्यतथ्य छानविन तथा गहिर अनुसान्धान कैना सरकार सहित सरोकारवाला निकायसे माग करले बा। 
बुधके रोज यूनियनसे एक प्रेस विज्ञप्ती प्रकाशित जारी करटी घटनाके सत्यतथ्य छानविन तथा गहिर अनुसान्धान कैना माग करल हो। दुई बरस यहोर वेपत्ता हुइल घटनाके अध्ययन तथा प्रकृति हेरेबेर पत्रकार खड्काके हत्या हुइल यूनियन आशंका करले बा । रिपोटिङके क्रममे कर्तव्य निर्वाह करटी–करटी अपन ज्यान गुमाइल मृतक पत्रकार खड्काके परिवारहे राज्यसे उचित क्षतिपूर्ति सहित उहाँक छावाछाईनके शिक्षादिक्षाके व्यवस्था कैना यूनियन जोडदार माग करले बा । 
नेपाल प्रेस युनियन डोटीके संस्थापक अध्यक्ष तथा रेडियो बुढीनन्दा एफएममे कार्यरत पत्रकार तेजबहादुर खड्का (तेजु) के निधनके खबरसे नेपाल प्रेस युनियन कैलाली शाखा स्तब्ध बनल विज्ञप्तिमे उल्लेख बा । २०७५ भदौ ९ गते बाजुरा जिल्लाके बुढीनन्दा नगरपालिकामे पर्ना धार्मिक तथा पर्यटकीय क्षेत्र बुढीनन्दा माताके रिर्पोटिङ करके लौटना क्रममे वेपत्ता हुइल पत्रकार खड्काके २०७६ अगहन कंगाल भेटल रहे । उ कंगाल नेपाल प्रहरीके केन्द्रिय विधि विज्ञान प्रयोगशालामे डिएनए परिक्षणके क्रममे २०७७ असार १६ गते केल कंगाल पत्रकार खड्काके रहल पुष्टि हुइल बा । 
रिर्पोटिङमे गैल पत्रकार वेपत्ता हुइबेरफे खोजविन कैनामे राज्यसे उदासिनता डेखैना, वषौंपाछे कंगाल भेटना ओ कंगालसंगे फेला परल कुछ सामाग्री नम्मा समयपाछेफे ओस्टे डेख्ना घटनाप्रति गहिरो छानबिन हुई पर्ना आवश्यकता खड्कल यूनियनके विज्ञप्तीमे कहल बा । अइसिन घटनासे समग्र पत्रकार असुरक्षित रहल महसुस करल कहल बा ।