पहिरोमे भँठल ६ जानेक् शव निकारगिल
पहुरा समाचारदाता
धनगढी, २० असार । बझाङके केदारस्युँ गाउँपालिका वडा ८ के मल्लेसिमा गैल पहिरोमे भँठल ६ जनहनके शव निकारगिल बा । एक जने भर आभिन बेपत्ता रहल बाटै ।
वडाध्यक्ष गणेशबहादुर बोहोराके अनुसार अक्के घरके ४३ वर्षीया रामतीदेवी जेठारा, १६ वर्षीया शान्तिकुमारी जेठारा, १३ वर्षीय बालक प्रयाग जेठारा ओ ७ बालिका अष्मिता जेठाराके शव भेटल बाटै । ओस्टके, १५ वर्षीया बालिका सन्तु जेठारा ओ ८१ वर्षीय दले जेठाराके फेन शव भेटल हो । २० वर्षीय गिरि जेठारा भर आभिन बेपत्ता रहल वडा अध्यक्ष बोहोरा जानकारी डेलै ।
वर्षासंगे गाउँ उपरसे आइल पहिरो केदारस्युँ गाउँपालिका–८ के मल्लेसीके २० घर पुहाइल उहाँ बटैलै । रातके पहिरो आइल पता पाइलपाछे घरभित्रे रहल अन्य भागके ज्यान जोगैलेसे फेन ७ जने भर पहिरोमे भँठल रहिट ।
स्थानीयके २२ भैँसी, ६५ बाख्रा ओ २४ वटा गाइगोरु फेन पहिरोसे पुहाइल जनाइल बा । ६५ घर परिवार बैठ्टी आइल बस्तीके बीच भागसे पहिरो गैलपाछे गाउँ नै जोखिममे परल बा । स्थानीयसे भोगचलन ओ अन्न उब्जाउ करटी आइल करिब आधा जमिन पहिरोसे पुहाइल स्थानीय बटैले बाटै । पहिरोसे घरबारविहीन हुइल व्यक्तिहुक्रे स्थानीय विद्यालयमे ओत लग्लेसे फेन आब कहाँ बैठ्ना कना चिन्ता हुइल बटैले बाटै ।
