सुदूरपश्चिमके कृषि मन्त्रालयभित्रे दिनेश खबरकर्मी उप्पर हातपात

पहुरा समाचारदाता
धनगढी, २१ असार । सुदूरपश्चिम प्रदेशके भूमि व्यवस्था कृषि तथा सहकारी मन्त्रालयमे दिनेश खबरकर्मीउप्पर हातपात करगिल बा ।
अट्वारके रोज दुपहर रिर्पोटिङके लाग कृषि मन्त्रालय पुगल दिनेश खबरके वरिष्ठ संवाददाता कमल सावदउप्पर पशुपंक्षी विकास महाशाखाके प्रमुख डा. हेमराज अवस्थीके कार्यकक्षमे धनगढी उप–महानगरपालिका वडा नम्बर ५ हसनपुरके हर्कबहादुर देउवा ओ उहाँके छावा ठक्कर देउवा दुव्र्यवहार करटी हातपात करल हुइट ।
कृषि मन्त्रालयसे मच्छी पालनके लाग अनुदान लेके फेन पोखरी निर्माण नैकरल विषयमे समाचार छापके अपन बदनाम करल कहटी छावा बाबा मिलके सावदउप्पर दुव्र्यवहार ओ हातपात करटी कुटपिट प्रयास करल हुइट ।
‘मै मन्त्रालयमे रहल बेला भेटौँ कहिके फोन करल रहै । मै ओहै आई कहिके बलैले रहु’ पत्रकार सावद कहलै, ‘समाचार लिखके मोर बदनाम करल कहटी कर्मचारीहुकनके सामने मोर उप्पर हातपात करके कुटपिट प्रयास कर्लै । मने उहाँहुक्रे छुटैलै ।’ ठक्कर देउवा कैलाली फुटबल संघके सदस्य समेत हुइटै ।
उहाँके बाबा हर्क देउवा कृषि मन्त्रालयसे गैल बरस मच्छी पालनके लाग कहटी एक लाख ४२ हजार ६ सय आठ रुपैँया अनुदान पाइल रहिट ।
शुन्य दमलव ५२ हेक्टर क्षेत्रफलमे माछा पोखरी निर्माणके लाग अनुदान लेहल देउवा पोखरी बिना निर्माण कर्ले भुक्तानी लेहल विषयमे समाचार प्रकाशित हुइल रहे ।
यहेबीच घटनाके सक्कु ओहोर विरोध हुइल बा । नेपाल पत्रकार महासंघ कैलाली एक विज्ञप्ती जारी करके घटनाके विरोध जनैले बा । हातमे संलग्न छावा बाबा हुकन कडा कारवाहीके मागसहित घटनाके विरोध हुइ लागल हो ।