ट्रक दुर्घटनामे एकके ज्यान गैल

पहुरा समाचारदाता
धनगढी, २९ असार । ट्रक दुर्घटनामे परके एक जनहनके ज्यान गैल बा । भीमदत्त राजमार्ग अन्तरगत जिल्लाके चुरे गाउँपालिका वडा नम्बर ३ मे रात १ बजेके समयमे धनगढीसे बझाङ जैटी रहल से १ ख १७३१ नम्बरके सरिया सिमेन्ट बोकल ट्रक दुर्घटना होके एकजनहनके ज्यान गैल प्रहरी जनैले बा ।

जिल्ला प्रहरी कार्यालय कैलालीके प्रहरी नायब उपरिक्षक प्रतिक विष्ट दुर्घटनामे परके गम्भीर घाहिल हुइल बझाङके बुङगल नगरपालिका २ के अन्दाजी ५० वर्षीय रामबहादुर बोहराहे उपचारके लाग सेती अस्पताल लन्टी रहल बेला ज्यान गैल बटैलै ।

ओस्टके दुर्घटनामे परके उहे ठाउँके अन्दाजी ५० वर्षीय नारदसिह धामी घाहिल हुइल बाटै । ट्रक अपनहे अनियन्त्रित होके दुर्घटनामे परल प्रहरी जनैले बा । चालक बुंगल नगरपालिका १ के ३२ वर्षीय कलक धामीहे प्रहरी नियन्त्रणमे लेहल बा ।