द्वन्द तथा तत्कालिन प्राकृतिक विपद सम्बन्धी छलफल कार्यक्रम

पहुरा समाचारदाता
धनगढी, १४ भदौ । अन्तर्राष्ट्रिय वेपत्ता दिवस २०८३ के अवसरमे द्वन्द तथा तत्कालिन प्राकृतिक विपद सम्बन्धी छलफल कार्यक्रम सम्पन्न हुइल बा ।

मानव अधिकारका लागि महिला एकल महिला समुह सुदूरपश्चिम प्रदेशके आयोजना तथा कुर्वे विष्ट्रो के सहयोगमे अन्तर्राष्ट्रिय वेपत्ता दिवस २०८३ के अवसरमे द्वन्द तथा तत्कालिन प्राकृतिक विपद सम्बन्धी छलफल कार्यक्रम कार्यक्रम हुइल हो । समुहके प्रदेश अध्यक्ष भगवती हमालके अध्यक्षतामे हुइल कार्यक्रममे गैर सरकारी संस्था महासंघ सुदूरपश्चिम प्रदेश अध्यक्ष देवी खनाल विशिष्ट अतिथि रहल रहिट । कार्यक्रममे सम्बोधन करटी उहाँ वेपत्ता परिवारसे आ–अपनके बारेमे सत्यतथ्य जाने पाई पर्ना अधिकार रहल बटैलै ।

सशस्त्र द्वन्दकालके बेला ढेर मनै अकालमे ज्यान गुमाई परल कहटी अभिन करिव १३ सय जाने वेपत्ताके सूचिमे रहल बटैलै ।

द्वन्दकालमे भारी क्षति गुमाइल कहटी विगतमे हुइल घटना आवसे नदोहरयाए कहिके दोषहीहे कार्वाही ओ पीडितहे परिपुरनसहित क्षतिपूर्ति मिले कहटी अन्तर्राष्ट्रिय वेपत्ता दिवस मनैना करल बटैलै ।ओस्टेक करके रसुवा घटनासे मुलुक अकल्पनिय क्षति भोगल कहटी जे जा सेकी आ अपन ओरसे सेक्ना सहयोग कैना बटैलै ।

मानव अधिकारका लागि महिला एकल महिला समुहके सल्लाहकार तथा फाया नेपालके अध्यक्ष गोमा आचार्य सशस्त्र द्वन्दके पीडितके अप्ध्यारोमे परल कहटी बाट उठाई नैछोरना बटैली । राज्य पक्षसे द्वन्द पीडितहे सम्बोधन करेपर्ना हो, मने ओइनके माग मुद्दाहे विस्रैटी गैल ओरस आवाज उठाई छोरे नैहुइना बटैलै । सशस्त्र द्वन्दकालके सोझा साझा मनै राहात पाई नैसेकल ओ निवेदनफे डेहे नैसेकल बटैली ।

दलित महिला संघके जिल्ला अध्यक्ष सविना सुनार सशस्त्र द्वन्दकालमे दलित समुदायसेफे ढेर जाने पीडित हुइल मने न्याय ओ राहातसे बञ्चित हुइल बटैली ।

द्वन्दपीडित धनगढी उपमहानगरपालिका–१४ के कञ्चनमाया योञ्जन तामाङ आपन गोसियामे सशस्त्र द्वन्दकालमे तत्कालिन माओवादी पक्षसे गोराके नशा टुटनामे मेरिक पिटल उहे पिडा ठप जटिल बन्टी जाके रोग बह्रटी जाके अन्तिममे ज्यान गैल मने राज्यपक्षसे द्वन्दपीडितके नाउँमे एक रुप्याफे राहात नैपाइल बटैली । उहाँ कहली उ क्षण कबु विस्राई नैसेक्ना घाउ बनल बा, मोर टे कहु पहुँच नैरहे, हम्रे कुछ राहात नैपैली । पहुँच रहट टे सायद हम्रेफे राहात पैटी ।
कैलारी गाउँपालिका वडा नम्बर ३ के द्वन्द प्रभावित लक्ष्मी चौधरी ढेर जाने द्वन्दप्रभावित राहातसे पैनासे बञ्चित हुइल बटैली ।

ओस्टेक करके कैलारी गाउँपालिका वडा नम्बर ४ मोहवती चौधरी आपन गोसियाहेफे सशस्त्र सशस्त्र द्वन्दकालमे अण्डकोष फुटना गरी पिटल कारण पाछे गोसियाके ज्यान गैल मने कुछ राहात नैपाइल बटैली । उहाँ कहली गोसियाके ज्यान गैलपाछे बहुट संघर्ष करेपरल मने राज्यपक्षसे राहातके नाउँमे एक रुप्या नैडेहल । उहाँहुकन जस्टे सशस्त्र द्वन्द प्रभावितहुकनके आ आपन कथा व्यथा रहल मने राज्यपक्षसे ओइनके माग मुद्दा विस्रैटी रहल बा ।

मानव अधिकारका लागि महिला एकल महिला समुहके प्रदेश कार्यक्रम अधिकृत कार्यक्रममे सहजीकरण करटी कुर्वे विष्ट्रोके सहयोगमे यिहीसे आघे कैलारी गाउँपालिकामे ओ अब्बे गोदावरी नगरपालिकामे शान्ति परियोजना मार्फत कार्यक्रम करटी रहल बटैली । उहाँ द्वन्द प्रभावित तथा सीमान्तकृत समुदायके विच आयआर्जन, क्षमता अभिवृद्धिलगायत टमान मेरिक कार्यक्रम करटी आइल बटैली । कार्यक्रममे स्वागत मन्तव्य लक्ष्मी चौधरी करल रहिट ।