धनगढी उपमहानगरपालिकासे बाढपीडितके लाग ४१ लाख ११ हजार १११ रुप्या सहयोग

पहुरा समाचारदाता
धनगढी, १५ भदौ । धनगढी उपमहानगरपालिकासे भोटेकोशी बाढसे प्रभावित तथा पीडितके सहयोगके लाग ४१ लाख ११ हजार १११ रुप्या आर्थिक सहयोग करले बा ।

उपमहानगरपालिकाके अनुसार उ रकम प्रधानमन्त्री दैवीप्रकोप उद्धार कोषमे जम्मा करल बा । बाढसे प्रभावित नागरिकके उद्धार, राहत तथा पुनःस्थापनामे सहयोग पुगे कना उद्देश्यसे उपमहानगरपालिकासे उ रकम उपलब्ध कराइल जनाइल बा ।

भोटेकोशीमे आइल बाढके कारण टमान क्षेत्रमे भारी जनधनके क्षति हुइल ओ प्रभावित परिवारहे तत्काल राहत तथा सहयोग आवश्यक रहल ओरसे स्थानीय तहके ओरसे सहयोग करल उपमहानगरपालिका जनैले बा ।

धनगढी उपमहानगरपालिकासे विपद्के यी कठिन समयमे पीडित नागरिकप्रति ऐक्यबद्धता जनैटी अपन ओरसे सहयोग करल हो ।