सुदूरपश्चिमके ढेर ठाउँमे वर्षा, सतर्कता अपनैना आग्रह
पहुरा समाचारदाता
धनगढी १४ भदौ । हाल कैलालीके धनगढीलगायत सुदूरपश्चिमके ढेर ठाउँमे वर्षा हुइटीरहल बा ।
अत्तरियास्थित जल तथा मौसम विज्ञान कार्यालय अनुसार आजसे दुई÷तीन दिनसम प्रदेशके अधिकांश ठाउँमे हल्कासे मध्यम ओ एक÷ई ठाउँमे ढेर भारी वर्षाके सम्भावना बा ।
कार्यालय प्रमुख इन्जिनियर सञ्जयकुमार साह यहाँके पहाडी क्षेत्रमे साधारण बडरी रही ढेर ठाउँमे मेघगर्जन, चट्याङसहित मध्यम वर्षा ओ एक वा दुई ठाउँमे ढेर भारी वर्षाके सम्भावना रहल जानकारी देलै ।
ओस्टे, तराई क्षेत्रमे साधारण बडरी रही ढेर ठाउँमे मेघगर्जन, चट्याङसहित मध्यम वर्षा ओ एक वा दुई स्थानमे भारी वर्षाके सम्भावना रहल बा । हिमाली क्षेत्रमे भर साधारण बडरी रही ढेर ठाउँमे मेघगर्जन, चट्याङसहित मध्यम वर्षाके सम्भावना बा ।
कार्यालय प्रमुख साहसे इ अवधिमे लगातार पानी पर्नाफे छिनछिनमे पानी पर्ना ओ घाम लागे सेक्ना अनुमान रहल बटैलै । “इ अवधिमे प्रदेशके सककु तराई, पहाड ओ हिमाली क्षेत्रमे मौसम बदली हुइटी रहल अनुमान बा, मने एक वा दुई ठाउँबाहेक ढेर भारी वर्षाके सम्भावना कम बा”, उहाँ कहलै मने, “तथापि लदिया तटीय क्षेत्र, डुबान हुइना चेप्ठी ठाउँमे बैठना नागरिकहुकनसे विशेष सतर्कता अपनैना आवश्यक बा ।”
आज रात यहाँके हिमाली क्षेत्रमे साधारण बडरी रही थोरचुन ठाउँमे मेघगर्जन, चट्याङसहित मध्यम वर्षाके सम्भावना रहल बा । पहाडी क्षेत्रमे साधारण बडरी रही थोर चुन ठाउँमे मेघगर्जन, चट्याङसहित मध्यम वर्षाके सम्भावना रहल बा मने तराई क्षेत्रमे साधारण बडरी रही कुछ ठाउँमे मेघगर्जन, चट्याङसहित मध्यम वर्षाके सम्भावना रहेल बा ।
ओकरबीच सशस्त्र प्रहरी बल, नेपाल नं ७ वैद्यनाथ बाहिनीसे कैलाली ओ कञ्चनपुरके बाढ प्रभावित क्षेत्र ओ लदिया तटीय क्षेत्रमे सतर्कताके लग आग्रह करल बा । ओस्टेक, पहाडके एक वा दुई ठाउँमे ढेर भारी वर्षा हुइना जानकारी प्राप्त हुइल उ अनुसार सतर्क रहन मातहतके युनिटहे निर्देशन देहली बाहिनी मुख्यालयके बाहिनीपति सशस्त्र प्रहरी नायब महानिरीक्षक (डआइजी) दिगविजय सुवेदी जानकारी देलै ।
पहाडी ओ तराई क्षेत्रके एकदुई ठाउँमे ढेर भारी वर्षाके सम्भावनाहे दृष्टिगत करटी सूचना प्रवाह करना साथे अपन मातहतके युनिटहे विपद् व्यवस्थापनके लग तयारी अवस्थामे राखना उहाँ बटैलै ।
