यातायात कार्यालयमे सेवाग्राहीहुकनके भिड, कोरोनाके त्रास
पहुरा समाचारदाता
धनगढी, ३० असार । असारके अन्तिम ओहोर यातायात व्यवस्था कार्यालय धनगढीमे सेवाग्राहीहुकनके अत्याधिक भिरभार हुइटी आइल बा । जौनकारण कोरोना फैलना त्रास फेन सेवाग्राहीहुकनमे बह्रल बा ।
कोरोना प्रभावपाछे जारी लकडाउनके अवधिके कर समेत यहे आर्थिक वर्षभिट्रे बुझाइक पर्ना कारण कुछ कुछ दिन याहोर कार्यलयमे भिरभार लग्टी आइल बा । असार मसान्तसम कर बुझाई नैसेक्लेसे जरिवाना समेत टिरेक पर्ना कारण फेन सेवाग्राहीहुकनके भिरभार लग्टी आइल हो ।
मने सुदूरपश्चिम प्रदेश सरकारके मातहत रहल यातायात व्यवस्था कार्यालय कैलाली सेवा प्रवाहहे व्यवस्थित बनैनामे लापरवाही करल गुनासो सेवाग्राहीहुकनके रहल बा ।
‘सरोकारवाला निकायके बेवास्ताके कारण अव्यवस्थित रुपमे कर बुझाइक पर्र्ना बाध्यता बा,’ धनगढी उपमहानगरपालिकाके वडा नम्बर ३ के प्रेम पाण्डेय कहलै, ‘सरकारहे कर बुझाइक लाग बिहान ६ बजेसे लाइनमे बैठे पर्ना विडम्वना हो ।’
औरे देशमे सक्कु कर अनलाइन मार्फत बुझैना व्यवस्ता कर्लेसे फेन नेपालमे अभिनसम पुराने कार्यशैली अप्नाइलओरसे लग्टी आइल भिरभारसे रोगके संक्रमण बह्रना डर रहल धनगढी ४ के टेक पन्त बटैलै ।
यातायात व्यवस्था कार्यालय धनगढीके प्रमुख लक्ष्मण शाह असार मसान्तभिट्टर कर बुझुइयाहुकन जरिवाना नैलग्ना हुइलओरसे भिड बह्रल बटैलै । ‘यी महिनामे अस्तही भिड रहठ । हम्रे आपनओरसे व्यवस्थापन करटी आइल बाटीं,’ उहाँ कहलै ।
आर्थिक बरसके ओरौनीमे सवारी कर बुझाइक पर्र्ना, नविकरण करेक पर्र्ना, सवारी साधन नामसारी करेक पर्र्ना लगायतके टमान काम लेके सेवाग्राहीहुक्रे अइठै । मने बैंक काउण्टरके अभाव, व्यवस्थापनमे वेवास्ताके कारण सेवाप्रवाहमे ढिलासुस्ती हुइटी आइल बा ।
