विपत्तिमे धनगढीके निजी अस्पतालके उदारता, प्रधानमन्त्री दैवी प्रकोप उद्धार कोषमे लाखौँ सहयोग
पहुरा समाचारदाता
धनगढी, १२ भदौ । रसुवा जिल्लामे आइल विनाशकारी बाढसे भारी जनधनके क्षति हुइलपाछे सरकारसे सहयोगके लाग करल आह्वानमे धनगढीके निजी अस्पतालफे सहयोगमे जुटल बटै ।
धनगढीकके निसर्ग अस्पताल, कैलाली अस्पताल, मायामेट्रो अस्पताल, नवजीवन अस्पताल ओ केयर टेकर अस्पतालसे मानवीय सेवाके भावनासहित प्रधानमन्त्री दैवी प्रकोप उद्धार कोषमे आर्थिक सहयोग जम्मा करल हुइट ।
सहयोग कैना अस्पतालमे निसर्ग अस्पतालसे रु. ११ लाख ११ हजार १११, मायामेट्रो अस्पतालसे रु. ३ लाख ११ हजार १११, नवजीवन अस्पतालसे रु. २ लाख २२ हजार २२२, कैलाली अस्पतालसे रु. १ लाख ११ हजार १११ ओ केयर टेकर अस्पतालसे रु. १ लाख १ हजार १०१सहयोग करले बटै ।
यैसिक पाँच ठो अस्पतालसे केल्ह कुल रु. १८ लाख ५६ हजार ६५६ प्रधानमन्त्री दैवी प्रकोप उद्धार कोषमे जम्मा हुइल बा ।
निसर्ग अस्पतालके अध्यक्ष तीर्थराज पन्त विपत्तिके समयमे पीडित नागरिकके साथमे ठरहयीना सक्कुहुनके सामाजिक दायित्व रहल बटैलै । कैलाली अस्पतालके अध्यक्ष जनकराज जोशी प्राकृतिक विपत्तिके पीडामे मलम लगैना निजी क्षेत्रफे जिम्मेवार हुके आघे बह्रेपर्ना बटैलै ।
उहाँ कहलै, “विपद् केक्रो व्यक्तिगत समस्या नैहो, यी सक्कुहुनके साझा पीडा हो । यैसिन कठिन समयमे राज्यहे सहयोग कैना हमार सामाजिक उत्तरदायित्वफे हो । अइना दिनमेफे आवश्यक सहयोगके लाग हम्रे तयार बटी ।”
रसुवामे आइल बाढसे भारी क्षति पु¥याइल अवस्थामे धनगढीके निजी अस्पतालसे डेखाइल यी सहयोग स्वास्थ्य क्षेत्र केवल उपचारमे केल्ह सीमित नैहुके विपद्के समयमे मानवीय सेवामे समेत अग्रसर हुई परठ कना सकारात्मक सन्देश डेले बा ।
