थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २८ सावन २६४६, शनिच्चर ]
[ वि.सं २८ श्रावण २०७९, शनिबार ]
[ 13 Aug 2022, Saturday ]

पहुरा दैनिक १८ बरसमे गोर टेकल

पहुरा | १ श्रावण २०७७, बिहीबार
पहुरा दैनिक १८ बरसमे गोर टेकल

पहुरा समाचारदाता
धनगढी,१ सावन ।
सुदूरपश्चिम प्रदेशके धनगढी, कैलालीसे प्रकाशित हुइटी आइल थारु भाषाके एक ठो केल दैनिक पत्रिका ‘पहुरा थारु दैनिक’ १८ बरसमे गोर टेक्ले बा ।

जिल्ला प्रशासन कार्यालय कैलालीमे २०५९ चैत २६ गते साप्तहिक पत्रिका प्रकाशनके रुपमे दर्ता हुइल पहुरा २०६६ चैत २९ गतेसे दैनिक प्रकाशन सुरु प्रकाशक स्माइल चौधरी बटैलै । ‘भाषा, संस्कृति ओ समाचारमे प्राथमिता’ कना नाराके साथ प्रकाशित हुइटी रहल यी दैनिकहे पहिच चो प्रेस काउन्सिल नेपालसे २०६७ साल चैत १० गते थारु भाषा, पत्रकारिताके विकासके लाग विशेष ओ उत्साहजनक पहल करटी विशिष्ट योगदान पुगाइल कहटी ‘प्रेस काउन्सिल भाषागत पत्रकारिता पुरस्कार’से सम्मान कैगिल रहे ।

यी दैनिकहे एक कार्यक्रमके विच वडका पहुना रहल निवर्तमान प्रधानमन्त्री झलनाथ खनाल, निवर्तमान उप–प्रधानमन्त्री, सूचना तथा संचारमन्त्री कृष्णबहादुर महरा ओ प्रेस काउन्सिल नेपालके पूर्व अध्यक्ष नारायणप्रसाद शर्मासे नगद सहित सम्मानपत्र हस्तान्तरण कैगिल रहे । ओटरे केल नाही भाषा, कला, संस्कृति, पहिचान ओ पत्रकारिता मार्फत योगदान पुगाइल कहटी दर्जनौ संघ, संस्थासे यी दैनिकहे सम्मान कैगिल बा ।

पहुरा पत्रिका दैनिक यात्रा सुरु करलपाछे प्रेस काउन्सिल नेपालसे २०६७÷०६८ के मुल्याङकमे ‘क’ वर्ग मे पर्ना सफल हुइल रहे । कलेसे अभिनसम प्रेस काउन्सिल नेपालके मुल्याङनमे ‘क’ वर्गमे परटी आइल बा । दैनिक प्रकाशनके क्रममे टमान बाधा व्यवधान आइल मने कबुफे विश्राम नइलेके निरन्तर आघे बह्रटी आज १७औ बसन्त पार करके १८औं बरसमे पौला टेक्लेसे बा । यी दैनिकके वेबसाइट (डिजिटल मिडिया) पहुरा डटकम (pahura.com) फे संचालनमे रहल बा । पत्रिका यहाँसम पुग्नामे सक्कु थारु, गैरथारु सरकारी, गैरसरकारी लगायत शुभचिन्तक सहयोगी, विज्ञापनदाता हुक्रनके बरवार सहयोग ओ सल्लाह रहल । ओकर अतिरिक्त यिहीहे आघे पुगाईकलाग ठप सहयोग ओ सुझावके आवश्यकता पत्रिका महशुस करले बा । आशा बा अपनेनके अमूल्य सुझाव ओ सहयोग हमार साथ रही ।

थारु पत्रकारिताके इतिहास

थारु पत्रकारिताके इतिहास खासे लम्मा नै हो । चार दशक आघे फाट्टफुट्ट पत्रपत्रिका ओ मुखपत्र प्रकाशन हुईल विल्गाइठ । समाचारमूलक पत्रिकाके इतिहास और छोट बा । २०५३ सालओर कैलालीसे सबसे पहिले जोखन रत्गैंया ‘मुक्ति डगर’ साप्ताहिक पत्रिका शुरुवात कर्ले रहैं । जौन पत्रिका खासे ढेरदिन निरन्तरता नैपाइल । ओकर बाद बर्दियासे गोपाल दहितके सम्पादनमे ‘मैगर हमार सन्देश’ साप्ताहिक पत्रिका ओ २०५९ सालमे अव्यस्थित वस्ती समाधान समाज नामक गैर सरकारी संस्थासे मुखपत्रके रुपमे ‘निसराउ’ साप्ताहिक कैलालीसे प्रकाशन हुईल ऊ फे एक दर्जन अंकमे ओरागिल । अपन जोस जाँगरके साथ कैलालीसे २०६० सालसे पहुरा साप्ताहिक सुरु हुईल ।

आर्थिक व्यवस्थापन ओ जनशक्तिके कमीसे पहुरा चल्ती चल्ती फेन मुर्झुराई परल रहिस, ओकर काँध ठप्ना काम २०६२ साल पुष महिनासेफे अर्धसाप्ताहिक रुपमे कैलालीसे ‘हमार पहुरा’ फेर झल्कल । अर्धसाप्ताहिक प्रकाशन हुईटी हुईटी २०६३ साउन ३ गतेसे ‘हमार पहुरा’ दैनिक रुपमे प्रकाशन सुरु करल । मने हमार पहुरा दैनिकफे गोरा लरबरैटी तीन बरससम आघे बह्रना प्रसास करल प्राविधिक कारण २०६६ साल चैत २८ गतेसे दैनिक यात्रासे विश्राम लेहे पुगल । ओकरपाछे २०६० सालमे जलम लेहल पहुरा साप्ताहिक २०६६ साल चैत २९ गतेसे दैनिक प्रकाशन सुरु करके अभिन निरन्तरता डेटी नेपालके इतिहासमे अपन नाउँ धारे सफल हुइल बा । ओसिक टे अब्बे दाङसे अग्रसान साप्तहिक, लमहीसे लौवा डगर त्रैमासिक, कैलालीसे हरचाली त्रैमासिक साहित्यिक पत्रिकाफे प्रकाशन हुइटी बा ।

सम्बन्धित

प्रकाशकीयः पहुरा दैनिकके १८ बरसके यात्रा

जनाअवजको टिप्पणीहरू