थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ सावन २६४६, अत्वार ]
[ वि.सं २९ श्रावण २०७९, आईतवार ]
[ 14 Aug 2022, Sunday ]

कैलारी गाउँपालिकाके सार्वजनिक सुनुवाइ

पहुरा | ४ श्रावण २०७७, आईतवार
कैलारी गाउँपालिकाके सार्वजनिक सुनुवाइ

पहुरा समाचारदाता
हसुलिया, ४ सावन ।
कैलारी गाउँपालिकाके गैल आर्थिक वर्ष २०७६/०७७ के सार्वजनिक सुनुवाइ कार्यक्रम अँटवारके रोज सम्पन्न हुइल बा ।

गाउँपालिकाके आयोजनामे सार्वजनिक सुनुवाइ करल हो । ओस्टेक करके, उहे कार्यक्रममे चालू आर्थिक वर्षके बजेट, नीति तथा कार्यक्रम फे सार्वजनिक करल बा । गाउँपालिकाके अध्यक्ष लाजुराम चौधरी ओ सामाजिक विकास शाखा अधिकृत यगम कलेल गैल आर्थिक वर्षके प्रगति ओ चालू आर्थिक वर्षके नीति, तथा कार्यक्रम प्रस्तुत करले रहिट ।

गैल आर्थिक वर्षमे बन्दाबन्दी ओ कोरोना भाइरसके महामारीके बाबजुद गाउँपालिकासे अधिकाङ्श योजना सम्पन्न करल कार्यक्रममे जनाइल बा । आर्थिक ओ भौतिक प्रगति दुनु ९०/९० प्रतिशत हुइल कार्यक्रममे जनाइल बा । मने कतिपय योजना लगायत लक्षित वर्गके कुछ कार्यक्रम सम्पन्न नइहुइल बटाइल बा ।

गैल आर्थिक वर्ष २०७६/०७७ मे कैलारी गाउँपालिकाके जम्मा बजेट (गैर सरकारी संस्थाके समेत करके ) ५० करोड २९ लाख रुप्या रहल रहे । गैल आर्थिक वर्षमे १३ ठो विधेयक निर्माण करलमे १३ गाउँ सभासे पारित हुइल जनाइल बा । ओस्टेक करके, गैल आर्थिक वर्षभिटरे साक्षर गाउँपालिका घोषणा कैना कहलमे उ पूरा नइहुइल कार्यक्रममे जनाइल बा ।

ओस्टेक, गाउँपालिकाके चालू आर्थिक वर्षके जम्मा बजेट (गैरसरकारी संस्थाके समेत करके) ५२ करोड ४७ लाख १७ हजार रुपैयाँ रहल बा ।

कार्यक्रममे बोल्टी गाउँपालिकाके अध्यक्ष लाजुराम चौधरी गाउँपालिकाके दीर्घकालीन विकासके लाग सक्कुहुनसंग समन्वय करके आघे बह्रना बटैलै । उहाँ विश्वभर महामारीके रुपमे देखा परल कोभिड–१९ के कारण आर्थिक, सामाजिक, विकास निर्माण लगायतके सक्कु क्षेत्रमे असर परल बटैलै । ओस्टेक करके, कोरोना महामारी रोकथामके लाग क्वारेन्टाइन ओ आइसोलेसन व्यवस्थापनके क्रममेफे भारी चुनौतीके सामना करे पर्ना उल्लेख करलै ।

भूमि, वन ओ शिक्षाके क्षेत्रमे स्थानीय, प्रदेश ओ सङ्घबीच ढेर बाट नइमिलल अध्यक्ष चौधरीके कहाई रहे । ‘हम्रहिनहे भूमि वितरणके अधिकार नइहो’, चौधरी ठप्लै । ओस्टेक करके, शिक्षा ऐन बनाइक लाग फे समस्या रहल बटैलै ।

कार्यक्रममे नेकपाके कैलारी गाउँपालिका अध्यक्ष बतासु चौधरी गाउँपालिकासे मजा नीति तथा कार्यक्रम बनाइल उल्लेख करटी बजेट कार्यान्वयनमे भर समस्या रहल बटैलै । ‘नानल नीति तथा कार्यक्रम ओ बजेट मजासे कार्यान्वयन कैना आवश्यक बा’, उहाँ कहलै ।

ओस्टेक, नेपाली काङ्ग्रेसके रमेश चौधरीसे उपभोक्ता समिति कार्यकर्तामुखी रहल आरोप लगैलै । उहाँ सार्वजनिक कार्यक्रममे सक्कुहुनहे सहभागी नइकराइल गुनासो करटी गाउँपालिकाके विकासके लाग सक्कुहसंग सहकार्य करके आघे बह्रना आवश्यक रहल औल्यइलै ।

गाउँपालिकासे नाफामुखी संस्थाहे अनुदान सहयोग कैना मजा नइरहल जिकिर करटी चौधरी ओसिन सहयोग रोक्न आग्रह करलै ।

कार्यक्रममे नेपालु चौधरी, प्रदेश सहकारीके अध्यक्ष उर्मिला चौधरी लगायतसे मन्तव्य रख्ले रहिट ।

कार्यक्रममे गाउँपालिकाके उपाध्यक्ष लक्ष्मी सत्गौंवा, प्रमुख प्रशासकीय अधिकृत खगेन्द्रराज जोशी, वडा अध्यक्षहुक्रे, गाउँ सभा सदस्य, वडा सदस्य, स्थानीय व्यक्ति, कर्मचारी लगायतके सहभातिगा रहल रहे । कार्यक्रमके सहजिकरण नेपाल आदिवासी जनजाति पत्रकार महासंघ (फोनिज) करले रहे ।

कर्मचारी पुरस्कृत

कैलारी गाउँपालिकासे उत्कृष्ट काम कैना कर्मचारीनहे पुरस्कृत करले बा । पुरस्कृत हुइलमे योजना शाखा प्रमुख एवम् क्वारेन्टाइन संयोजक सन्तोषकुमार चौधरी, कविराज सुवास साह, अहेब सञ्जिब गुरुङ, अनमी उर्मिला जोशी रहल बटै ।

ओस्टेक, हेल्थ असिस्टेन्ट कुसुम चौधरी, अहेब नाथुराम चौधरी, ल्याब असिस्टेन्ट सन्तोष चौधरी, वडा नम्बर २ के सचिव हिरा ठकुल्ला, चालक कुन्तेराम चौधरी ओ कार्यालय सहयोगी विक्रम चौधरीहे पुरस्कृत करल बा । ओइनहे जनही १० हजार रुपैयाँ पुरस्कार डेहल बा ।

ओस्टेक करके, कोरोना रोकथाम तथा न्यूनीकरणके लाग रातदिन खटल स्वास्थ्यके कर्मचारी, स्वयम् सेवक सक्कुहुनहे सम्मान करल बा । ओस्टेक समाजसेबी नेपालु चौधरी, इन्दु चौधरी, रामकुमार चौधरी, शिक्षक जगन्नाथ चौधरी, आरडीआरसी लगायतहे सम्मान करल बा ।

जनाअवजको टिप्पणीहरू