सार्वजनिक कार्यक्रममे बिना मास्क प्रहरी प्रमुख ओ जनप्रतिनिधि
पहुरा समाचारदाता
सुखड ६ सावन । अब्बा कोरोना महामारी बा । आमनागरिकहुकन सरकार अनिवार्य मास्क लगैना आग्रह करटी
आइल बा । अत्रासम कि मास्क नैलगैना मनैनहे दिनहुँ प्रहरी प्रशासन कानूनी कारबाही करटी आइल बा ।
मने कौनो सार्वजनिक कार्यक्रममे प्रहरी प्रमुख ओ जनप्रतिनिधी समेत बिना मास्क नैलगाइल पागिल बाटै । आपन कार्यालयसे मास्क बोकके गैलपाछे कार्यक्रम स्थलमे मास्क नैलगैना मध्येके एक हुइटै ईलाका प्रहरी कार्यालय सुखडके प्रमुख तथा प्रहरी निरीक्षक हरिशरण भट्ट ।
घोडाघोडी नगरपालिका वडा नम्बर ७ मे प्रहरी चौकी स्थापनाके लाग हुइल कार्यक्रममे २ सयसे ढिउर मनैनके सहभागिता रहल रहे । कार्यक्रममे सहभागी रहल मनै मध्ये अधिकांश मनै बिना मास्क लगैना सहभागी हुइल रहिट । न टे सामाजिक दूरी कायम करके बैठल रहिट । विश्व स्वास्थ्य संगठन कौनो फेन सार्वजनिक कार्यक्रममे एक मनैसे डोसर मनैसमके भौतिक दूरी कम्तीमे १ मिटर हुइक पर्ना जनैटी आइल बा ।
स्वास प्रस्वासके माध्यमसे कोरोना भाइरस सर्न हुइलओरसे कोरोना रोक्नमे मास्क अनिवार्य लगाइक पर्ना फेन विश्व स्वास्थ्य संगठनके अनुरोध बा ।
यी बेला औरे जहन मास्क लगाइक लाग सुझाव डेहक पर्ना ओ नैलगैलेसे कारबाही कर्र्ना प्रहरी अप्नही मास्क बिना बिल्गैना चरम लापरवाही हो । प्रहरी निरीक्षक भट्ट सक्कु जहन मास्क नैलगाइल डेखके अप्ने फेन नैलगाइल बटैलै ।
‘कार्यालयसे जाइबर लेके गैल रहु । उहाँ गैनु टे बहुट गर्मी लागलपाछे खोलके बैठगिनु’, उहाँ कहलै– ‘औरे जे फेन नैलगैले रहिट । मै किल लगाके सुरक्षित हुइना नैहो ।
कार्यक्रममे घोडाघोडी नगरपालिका वडा नम्बर ७ के वडाध्यक्ष धनबहादुर बम फेन रहिट । मने उहाँ फेन उ सार्वजनिक कार्यक्रममे बिना मास्क बिल्गाइल रहिट ।
‘औरे जहन सचेतना फैलाइना प्रहरी अप्नही बिना मास्क सार्वजनिक कार्यक्रममे गैलपाछे औरे जहनहे नियमके पालना करैना कत्राके उपयुक्त हो ?’ जिल्ला प्रहरी कार्यालय कैलालीके प्रवक्ता प्रहरी नायव उपरीक्षक प्रतीक विष्ट कहलै– ‘प्रहरीहुकन अनिवार्य मास्क लगाइक पर्ना निर्देशन डेले बाटी । सक्कु जे मास्क लगैही परी ।’
इलाका प्रहरी कार्यालय सुखडके प्रहरी प्रमुख सार्वजनिक कार्यक्रममे मास्क नैलाइल विषयमे छानबिन कर्ना प्रहरी प्रवक्ता बिष्ट कहलै ।
कोरोनाके जोखिम कायममे रहलेसे फेन नियमनकारी निकाय, जनप्रतिनिधि किल नाई सर्वसाधारण फेन बिना मास्क लगैले सार्वजनिक कार्यक्रम बिल्गाई लागल बाटै । जेही सहजुले कोरोनाके संक्रमण फैलना जोखिम बह्रल बा । जौनकारण सावधानी अप्नैना जरुरी बा ।
