बीपी स्मृति दिवसमे वृक्षारोपण
पहुरा समाचारदाता
धनगढी, ६ सावन । नेपाली कांग्रेस कैलालीसे महामानव बीपी कोईरालाके ३८ औं स्मृति दिवसके अवसरमे बृहत वृक्षारोपण करले बा ।
मंगरके सकारे नेपाली कांग्रेस क्षेत्र नम्बर ५ प्रदेश सभा (ख) से धनगढी उपमहानगरपालिका वडा नम्बर ६ मे रहल हनुमान मन्दिर परिसरमे वृक्षारोपण सम्पन्न करले बा । ओस्टेक करके नेपाली कांग्रेस क्षेत्र नम्बर ५ प्रदेश सभा (क) से धनगढी उपमहानगरपालिका वडा नम्बर १५ मे रहल कनरी पार्क परिसरमे वृक्षारोपण करले बा ।
ओस्टेक करके पब्लिक क्याम्पस प्रध्यापक संघ नेपाल ईकाइ समिति कैलाली बहुमुखी क्याम्पस धनगढी कैलालीसे स्मृति पार्कमे वृक्षरोपण करले बा । ओस्टेक करके बीपी स्मृति दिवसके अवसरमे धनगढी उपमहानगरपालिका वडा नम्बर ५ जाईके यूवाहुक्रे नवनिर्मित वडा कार्यालय परिसरमे वृक्षारोपण करले बा ।
नेपाली कांग्रेस कैलालीके सभापति नरनारायण शाह (मनु) से जिल्लासे वडासमके समिति, भातृ संगठन ओ शुभेच्छुकहुक्रे बीपी स्मृति दिवसके अवसरमे आयोजना करल वृक्षारोपण कार्यक्रममे सहभागी हुइल बटैलै । उहाँ कहलै, बीपीके समाजवादी दर्शनसे नेपाली जनताके मन जिटल बा । टबमारे वहाँके स्मृति दिवसमे सर्वसाधारणके भव्य उपस्थिति हुइना करठै ।
वृक्षारोपण कार्यक्रममे नेपाली कांग्रेस क्षेत्रीय समितिके पदाधिकारी, प्रदेशसभा क्षेत्रीय समितिके पदाधिकारी, नेपाली कांग्रेस प्रदेश सभा सांसद टेकबहादुर रैका, धनगढी उपमहानगरपालिकाके नगरप्रमुख नृपबहादुर वड, उपप्रमुख सुशीला मिश्र भट्ट, नेपाली कांग्रेस कैलालीके नेता नारायण भट्ट, महिला संघके जिल्ला अध्यक्ष पुष्पा भट्ट लगायत टमान नेता कार्यकर्ताहुकनके उपस्थिति रहे ।
