सामाजिक दूरी कायम कैके गुरही टिहुवार मनैना सखी सञ्जालके अनुरोध
पहुरा समाचारदाता
धनगढी, ७ सावन । सामाजिक दूरी कायम कैके यी बरस गुरही टिहुवार मनैना सखी सञ्जाल कैलाली सक्कु जनहनहे अनुरोध करले बा ।
विश्वभर महामारीके रुपमे फैलल् कोरोना भाइरस (कोभिड–१९) को भयाभह अवस्थाहे मध्यनजर करटी सञ्जालसे यी बरस सामाजिक दूरी कायम कैके, भिड्भाड नाइ कैके आआपन गाउँ घरके चोक चोकमे मनैना अनुरोध करल हो ।
सखी सञ्जाल लगायत टमान संघ संस्थाके धनगढीमे बैठल बैठकसे ‘अपने बाँची ओ औरेहे फेन बचाई, सुरक्षित ओ स्वस्थ रही’ कना भाव सहित सुरक्षित ढंगसे गुरही मनैना बुधके एक प्रेस विज्ञप्ति मार्फत जानकारी कराइल हो ।
सञ्जालके कार्यबाहक संयोजक उन्नती चौधरीसे हस्ताक्षरित विज्ञप्तीमे (कोभिड–१९) के भयाभह अवस्थाहे मध्यनजर करटी यी बरस सामाजिक दूरी कायम कैके, भिड्भाड नाइ कैके अपने गाउँठाउँके चोकमे गुरही मनैना उल्लेख करल बा ।
बर्खा ओराइल पश्चात् किसानहुक्रनके उब्जाइल अन्न बालीमे किरा फट्याङ्रग्रा नलागे ओ सक्कु दिदीबहिनीयाहुक्रे स्वास्थ्य लाभ होए कना कामना सहित थारु समुदायमे यी टिहुवार बर्सौसे मनैटी आइल बाटै । यी टिहुवारमे गाउँके चोकमे महिला दिदिबहिनियाहुक्रे गुरही अस्रैना ओ पुरुष दादुभैया गुरहीहे पिटके भगैना चलन रहल बा । यिहीसे धान बालीमे लाग किरा नाश होके बालीनाली सप्रना, दुःख विमार दूर हुइना जनविश्वास रहल बा ।
यहोर धनगढी उपमहानगरपालिके वडा नं. ८ गुरही चौक(क्याम्पस रोड)मे विगत एक दशकसे सामूहिक रुपमे भव्यताके साथ गुरही टिहुवार मनैटी आइल बा । मने (कोभिड–१९) के भयाभह अवस्थाहे मध्यनजर करटी यी बरस धनगढीमे फेन सामाजिक दूरी कायम कैके, भिड्भाड नाइ कैके आआपन गाउँ घर टोल समुदायमे मनैना फेन अनुरोध करल बा ।
यी बरस यिहे सावन १० गते शनिच्चरके रोज गुरही टिहुवार (नाग पञ्चमी) रहल बा । थारु समुदायके यी पहिल टिहुवार हो ।
