लम्कीचुहा नगरपालिकामे अख्तियारके छापा

पहुरा समाचारदाता
धनगढी, ७ सावन । कैलालीके लम्कीचुहा नगरपालिकामे अख्तियारसे छापा मरले बा ।

गत आर्थिक बरसके मिति राखके पालिकाके कर्मचारी आवासगृहमे कानून विपरीत चेक काटल समाचार सञ्चार माध्यममे प्रकाशन ओ प्रशारण हुइलपाछे अख्तियार दुरुपयोग अनुसन्धान आयोग कञ्चनपुर छापा मारल हो । अख्तियार कञ्चनपुरके प्रमुख खगेन्द्र रिजाल आर्थिक बरस ओराइलमे पूरान मिटि राखके भुक्तानी हुइटी रहल उजुरी आइलपाछे टोली लम्कीचुहा पठाईल बटैलै । अख्तियारके टोलीसे नगरपालिकाके कागजात समेत नियन्त्रणमे लेहल बा ।

लौव आव २०७७/०७८ शुरु हुइलेसे फेन कानून विपरीत लम्कीचुहाके कर्मचारी आवासगृहमे बैठके चेक कट्टी रहल पाइल रहे । नगरपालिकाके लेखा अधिकृत धर्मराज उपाध्याय, लेखापाल सरोजकुमार चौधरी लगायत कर्मचारी आवासगृहमे बैठके चेक काटल अवस्थामे फेला परल रहे ।

सुदूरपश्चिममे अख्तियारके स्टिंग अपरेशन

अख्तियार दुरुपयोग अनुसन्धान आयोग महेन्द्रनगर कार्यालयसे पाछेक एक बरसमे करल १२ ठो स्टिङग अपरेशनमे सफलता पैले बा । उ अप्रेशसनमे २१ जनहनहे नगद सहित रंगेहात पक्राउ करल हो । उहाँहुक्रनसे नगद १३ लाख ७० हजार एक सय रुपैयाँ समेत बरामद करल बा । अख्तियार दुरुपयोग अनुसन्धान आयोग महेन्द्रनगर कार्यालयके शाखा अधिकृत हरिश जोशीले जानकारी डेलै ।

अख्तियारके अनुसार आर्थिक बरस २०७६/७७ मे मालपोत कार्यालय टीकापुरके नासु सिंहवहादुर सिंह ओ खरिदार नरराज पाण्डेयहे लालपुर्जाके प्रतिलिपी बनाइल बाफत ८ हजार घुस सहित पक्राउ परल पहिल स्टिङ«ग अप्रेशसन रहे ।

यातायात व्यवस्था कार्यालय सेतीके निमित्त कार्यालय प्रमुख गम्भीर सिंह, अधिकृत भुवन जोशी ओ जयराज कारिगर मारुती सुजुकी कार नामसारी कैके डेहल वाफत एक लाख ६६ हजार एक सय रुपैया बरामद करल रहे । सब डिभिजन वन कार्यालय विपीनगरके वन अधिकृत सुरेश चन्द्र डिसी छुटपुर्जी सिफारिस सहज कराके डेहल वाफत तीन लाख २६ हजार घुस लेहल अवस्थामे पक्राउ परलै ।

अख्तियारके अनुसार शसस्त्र प्रहरी बल भजनीके घुमुवा शसस्त्र प्रहरी सहायक हवल्दार ज्ञानवहादुर चौधरी ओ रतिराम चौधरी मालसामान आइ डेहल वाफत २० हजार घुस सहित अख्तियारके फन्दामे परलै कलेसे ईलाका प्रहरी कार्यालय गड्डाचौकीके प्रहरी जवान दिपक चौधरी फेन ५ हजार घुस लेटी रहल बेला पक्राउ परलै । शहरी विकास तथा भवन निर्माण विभाग संघीय आयोजना कार्यान्वयन ईकाई धनगढीके ईन्जिनियर त्रिलोक जोशी भवन निर्माणके ठेक्का सम्झौता ओ म्याद थप लगायतके काम कर डेहल वाफत दुई लाख ५० हजार सहित पक्राउ परल अख्तियारके शाखा अधिकृत जोशी बटैलै । मालपोत कार्यालय कञ्चनपुरके खरिदार ललिता रोकाया जग्गा नामसारी करल वापत एक लाख ५० हजार सहित रंगेहात पक्राउ परल रही ।

सिद्धार्थ सामुदायिक वनके अध्यक्ष कुवेर थापा ओ कोषाध्यक्ष प्रेम सिंह वनके खोलुवासे ट्याक्टरसे माटी डारेबर एक लाख ६० हजार रकम सहित पक्राउ परल रहिट । जलस्रोत तथा सिंचाई विभाग डिभिजन कार्यालय बैतडीके निमित्त कार्यालय प्रमुख ईन्जिनियर सुरेशराज भट्ट चमेलिया कानीखोला तटबन्ध नियन्त्रण निर्माण कार्यके सम्झौता कैना एक लाख सहित फन्दामे परलै ।

ईलाका प्रहरी कार्यालय मसुरीयाके प्रहरी नायव निरिक्षक दिलवहादुर महरा ओ विचौलिया सामुदायिक वनके अध्यक्ष बृखवहादुर धामी एक स्थानीय दम्पतिके घरायसी झगडा मिलैना कहटी लेहल ५० हजार नगद सहित पक्राउ परल अख्तियारके तथ्यांकमे उल्लेख करल बा । ओस्टके जिल्ला प्रहरी कार्यालय कैलालीके प्रहरी निरिक्षक प्रकाश कार्की ओ कानुन व्यवसायी हिमालय विष्ट झुटा मुद्दा लगाके थुनामेमे राखलहे छुटैना कहटी लेहल ५० हजार सहित पक्राउ परलै ।

आर्थिक बरसके असार अन्तिमओर जोशीपुर गाउँपालिकाके नासु सिद्धराज जोशी तालिम सञ्चालन करल वापत भुक्तानी डेना क्रममे ८५ हजार घुस सहित पक्राउ परल सुचना अधिकारी समेत रहल शाखा अधिकृत जोशी जानकारी डेलै । आयोगसे स्टिङ अपरेशनके प्रगतिमे ढिउर सफलता प्राप्त करल जनैले बा । विगतमे सफलताके दर ६५ प्रतिशत रहलमे अब्बे बह्रके ८८ प्रतिशत पुगल बा । भ्रष्टाचार सामाजिक प्रणालीके रुपमे स्थापित हुइ लागल ओरसे जबसम यकरउपर राज्यसे निर्मम प्रहार कैना सामथ्र्य नाइ राखी तबसम सुशासनके बात निरर्थक हुइना आयोगके निमित्त प्रमुख महेश पाण्डेय बटैलै ।