लम्की चौराहामे दिनदहाडे एक युवकउपर खुकुरी प्रहार
पहुरा समाचारदाता
लम्की, ९ साउन । कैलालीके लम्कीमे एक युवक उपर दिनदहाडे खुकुरी प्रहार हुइल बा ।
लम्कीचौराहा लग्गे रहल लम्की सार्बजनिक सौचालय आघे एक सैलुनमे कपार कटाके बाहर निक्रटी किल एक समूहसे लम्कीचुहा नगरपालिका वडा नम्बर १ के २८ बर्षिय रमेशबहादुर शाहीउपर खुकुरी प्रहार करल जनाइल बा ।
खुकुरी प्रहारसे शाहीके दुनु कन्धाके दायाँबायाँ गम्भीर घाउ हुइल बा, कलेसे शरीके अन्य भागमे समेत खुकुरीसे कटल बा । करीब ७/८ जनहनके समूहमे आइल आक्रमणकारीहुक्रे एक्कासी आक्रमण करल प्रत्यक्षदर्शी जनैले बाटै ।
शाहीउपर ३/४ जने खुकुरी पक्रल व्यक्ति आक्रण करल रहिट । बचाउ, बचाउ कहटी भागेबर पाछेसे रखेट्टी उहाँहुक्रे खुकुरी प्रहार करल प्रतयक्षदर्शी बटैले बाटै । घाईते शाही आक्रमणकारीके हुलसे भागके चौराहा लग्गे रहल प्रहरी बिट ओर भागलपाछे बच्ना सफल हुइल रहिट । ज्यान मर्ना उद्देश्यसे धारीलो हतियार लेके आक्रमण कैना समूह भर फरार हुइल बा । घटना हुइल करीब १० मिनेट पाछे किल प्रहरी घटनास्थल पुगल रहे ।
घाईते शाहीके लालरत्न अस्पतालमे उपचार हुइटी रहल बा । आक्रमण करुइया समूह यिहे क्षेत्रके रहल कहटी आपनहे ज्यान मर्ना उद्देश्यसे खुकुरी प्रहार करुइया व्यक्तिहे हदैसमके कारबाहीके लाग शाही सक्कु जनहनसे आग्रह करले बाटै ।
