लम्कीमे यातायात कार्यालयके स्थापनाके माग करटी प्रदर्शन

पहुरा समाचारदाता
लम्की, १० सावन । कैलालीके लम्कीमे यातायात व्यवस्था कार्यालय स्थापनार्थ वृहत दवाबमूलक ¥याली प्रदर्शन करल बा ।

कैलाली जिल्लाके पूर्वी क्षेत्रहे पायक पर्ना स्थान लम्की रहल ओरसे लम्कीमे यातायात व्यवस्था कार्यालय स्थापनाके लाग माग करटी शनिच्चरके रोज वृहत ¥याली प्रर्दशन हुइल बा । स्थानीय राजनीतिक दलके प्रतिनिधि, उद्योग वाणिज्य संघके प्रतिनिधि, टमान संघ संस्थाके प्रतिनिधि, व्यापारी, शिक्षक, विद्यार्थी तथा आम सर्वसाधारण उपस्थिति रहल प्रदर्शन ¥याली लम्की आधुनिक बसपार्क पुगके लम्की चोकमे कोण सभामे परिणत हुइल रहे ।

महिला नेत्रृ शुसिला शाही लम्कीमे यातायात व्यवस्था कार्यालयके लाग आवश्यक वित्तीय संस्था, टमान बिमा कम्पनी रहल ओरसे यातायात कार्यालय लम्कीमे स्थापना नइकरलेसे कडा आन्दोलन कैना बटैली ।

कोण सभाहे सम्बोधन करटी आन्दोलन समितिके प्राविधिक सल्लाहकार संयोजक विष्णु प्रसाद खनाल संघीयताके मर्म अनुसार कार्यालय स्थानीय स्तरमे आसेके पर्ना हुइलेसेफे हालसम नइपुग्ना दुःखके बाट रहल बटैलै । ओस्टेक लम्कीमे नापी कार्यालय, मालपोत कार्यालयकेफे स्थापना हुई पर्ना उहाँ बटैलै ।

नेपाली काँग्रेसके ओरसे बोल्टी लवबहादुर शाही सरकारहे ‘लम्कीमे यातायात व्यवस्था कार्यालयके स्थापना करडेलेसे राजश्व बढाडेना बटैलै । उहाँ कहलै–‘राजश्व बढाडेना कहलेसेफे सरकारसे नइसुनल ओरसे यी विषयमे जनप्रतिनिधिफे आवाज उठैना आवश्यक रहल कहलै । यातायात कार्यालय लम्कीमे स्थापना करेबेर सरकारहे भाडा ओ कर्मचारीहे सेवा सुविधा डेना समस्या हुइलेसे लम्कीचुहा नगरपालिकावासी चन्दा डेहेफे व्यवस्थापन कैना तयार रहल शाही बटैलै ।

सुदूरपश्चिम प्रदेशके दुसरा भारी यातायात व्यावसायी संस्था कर्णाली रिभर यातायात प्रा.लि के अध्यक्ष धिरजबहादुर शाही कैलाली जिल्लाके पूर्वी क्षेत्रके पालिका टीकापुर नगरपालिका, जानकी गाउँपालिका, लम्कीचुहा नगरपालिका, बर्दगोरीया गाउँपालिका, जोशीपुर गाउँपालिका ओ घोडाघोडी नगरपालिकाहे पाएक पर्ना स्थान लम्की रहल बटैलै । अध्यक्ष शाहीसे लम्कीमे यातायात व्यवस्था कार्यालय स्थापना करेक लाग आवश्यक सहयोग कैना तयार रहल जानकारी करैलै ।

सत्तारुढ पार्टी नेकपा लम्कीचुहा नगर कमिटिके अध्यक्ष महेन्द्र ढुङगाना अपने पार्टीके सरकार हुइलेसेफे माग सम्बोधन कराइक लाग सडकमे आई पर्ना बाध्यता रहल ओ लम्कीमे यातायात व्यवस्था कार्यालय स्थापनाके आन्दोलनमे अपनेहुकनकेफे ऐक्यबद्धता रहल बटैलै ।

कोण सभाके समापन करटी दबाबमुलक कार्यक्रमके संयोजक जयरुप बुढा टीकापुर नगरपालिका, जानकी गाउँपालिका, महोन्याल गाउँपालिका, लम्कीचुहा नगरपालिका, बर्दगोरीया गाउँपालिका, घोडाघोडी नगरपालिका, जोशीपुर गाउँपालिकाके लाग पायक पर्ना स्थान लम्की रहल बटैलै । संयोजक बुढा अँटवारके रोज प्रदेश सरकारके मुख्यमन्त्री कार्यालय, भौतिक पूर्वाधार मन्त्रालयमे डेलिगन जैना बटैटी आन्दोलनमे सहभागी सक्कुहुनहे धन्यवाद व्यक्त करलै ।