कर्तव्य ज्यान मुद्दाके फरार प्रतिवादी पक्राउ
पहुरा समाचारदाता
धनगढी, ११ सावन । कर्तव्य ज्यान मुद्दाके फरार प्रतिवादी ८ बर्ष ७ महिना पाछे पक्राउ परल बाटै । पक्राउ परलमे सुर्वण श्रेष्ठ रहल जिल्ला प्रहरी कार्यालय कैलालीके प्रवक्ता प्रतिक विष्ट जनैलै ।
कैलालीके धनगढी उप–महानगरपालिका वडा–१ बैठना बर्ष ४१ के सुरेन्द्रबहादुर सिंहहे २०६८ कार्तिक १८ गते धनगढी–८ धनगढी गाउस्थित दुर्गा मन्दिरमे लागल मेला हेरे गैल बेला सुर्वण श्रेष्ठ समेतके २ जाने कुटपिट करके घाहिल बनैले रहिट ।
घाहिल सिंहके उपचारके क्रममे ज्यान गैलपाछे दुनु जाने फरार रहल हुइल रहिट । फरार मन्से एक जाने प्रतिवादीहे पक्राउ करके कर्तव्य ज्यान मुद्दामे सक्कु अनुसन्धान कार्य पुरा करके कैलाली जिल्ला अदालतसे जन्म कैद २० बर्ष फैसला हुसेकल बा । कलेसे सुवर्ण हालसम फरार रहलमे खोज तलास कैना क्रममे सावन १० गते धनगढी उप–महानगरपालिका वडा–९ स्थित नुकछिपके बैठल अवस्थामे फेला पारके पक्राउ करल प्रवक्ता विष्ट जनैलै ।
प्रतिवादी सुवर्णहे आवश्यक कारबाहीके लाग अँटवारके रोज कैलाली जिल्ला अदालतमे बुझाइल बा ।
