थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २८ सावन २६४६, शनिच्चर ]
[ वि.सं २८ श्रावण २०७९, शनिबार ]
[ 13 Aug 2022, Saturday ]

घुराहा पूलके माटी ढसके दुर्घटना हुइना उच्च जोखिम

पहुरा | १२ श्रावण २०७७, सोमबार
घुराहा पूलके माटी ढसके दुर्घटना हुइना उच्च जोखिम

राम दहित
धनगढी, १२ साउन ।
कैलालीके धनगढी उपमहानगरपालिका ओ कैलारी गाउँपालिका जोड्ना घुराहा लडियाम बनल घुराहा पूलके पाजर स्पानके माटी ढसलपाछे दुर्घटना हुइना जोखिम बह्रल बा ।

बर्साट ओ लडियाम आइल बाढसे पूलके दुनु साइडके माटी ढसलपाछे दुर्घटना हुइना उच्च जोखिम बह्रल हो । गैल बरस फेन पुलके दुनु पाजरके माटी ढसल रहे । जिहीहे कैलारी गाउँपालिकासे मर्मत सम्भार करल रहे । यी साल फेन पूलके दख्खिन साइड ओर माटी ढसल बा ।

पूलके समयमे मर्मत सम्भार नाइ कैलेसे दुर्घटना हुइनाके साथे पूल फेन जोखिममे परे सेक्ना डेखगैल बा । कैलारी गाउँपालिका वडा नं. ३ बर्कामुराके स्थानीय नरेन्द्र चौधरी पूलके साइड साइडके माटी ढसलपाछे दुर्घटना हुइना ढिउर जोखिम बह्रल बटैलै ।

‘पुलके डुनु साइड ओर माटी पुहके खटहा बने लागल बा, यिहीसे रातबिराट नेंगुइया सावारी साधन ढिउर दुर्घटनामे पर्ना डेखजाइठ्,’ उहाँ कहलै–‘पूलके समयमे मर्मत सम्भार नाइ हुइ कलेसे बरवार दुर्घटना घटे सेकी ।’

ओस्टके यहोर हुलाकी सडक सम्बन्धित कार्यालय (सडक डिभिजन कार्यालय) हे हस्तान्तरण नाइ कैटी ठाउ“ठाउ“मे परल खोल्टी खोल्टासे फेन दुर्घटनाके जोखिम बह्रल बा । धनगढी क्याम्पसरोडसे कटैनीपुलसमके ३१ किलोमिटरके हुलाकी सडक खण्डमे परल खोल्टी खोल्टासे दुर्घटना हुइना जोखिम बह्रल हो ।

क्याम्पसरोड (शुन्य प्वाइन्ट)से कैलारी गाउँपालिकाके कटैनी पुलसम एक लेन (३.७५ मिटर) डगरके ठाउँ ठाउँमे खोल्टी खोल्टा परके जिर्ण बन्टी गैल बा । एक बरस आघे किल उक्त सडक खण्डमे परल खटहा खुटहीके मर्मत सम्भार करल रहे । मने फेरसे ठाउँ ठाउँमे खटहा परके दुर्घटना हुइना जोखिम बह्रल बा । उक्त सडक खण्ड अन्र्तगत धनगढी उपमहानगरपालिका भिट्टर पर्ना क्षेत्रमे ठाउँ ठाउँमे ढिउर जैसिन खोल्टी खोल्टा परल बा ।

सडकमे परल खोल्टी खोल्टासे दिनहु जैसिन छोटबर दुर्घटना हुइटी आइल बा । शनिच्चरके रोज फेन फुलवारी डिपोबजार लग्गे बरवार दुर्घटना हुइनासे बचल स्थानीयहुक्रे बटैले बाटै । सडकमे परल खोल्टी खोल्टाके साथे निर्माण करल कल्भर्ट फुटके निक्रटी रहल सरिया ज्यानमारा बन्ना उहाँहुक्रे बटैले बाटै ।

धनगढी–हसुलिया अटो चलैटी आइल दीलिप चौधरी सडकमे परल खोल्टी खोल्टासे अटो चलैना ढिउर समस्या रहल बटैले । ओस्टके उहाँ उहीसे अटो पल्टना फेन ढिउर सम्भावना रहल बटैलै । मने समयमे उ सडक मर्मत हुइलेसे दुर्घटना न्यूनीकरण हुइना विश्वास व्यक्त करलै ।

‘हुलाकी सडक ठाउँ ठाउँमे फुटके खटहा ओ पानी जम्र्याइल रहठ्,’ अटो चालक चौधरी कहलै–‘यिहीसे स्पीडमे रहल सवारी साधन दुर्घटना हुइना सम्भावना ढिउर रहठ् ।’

गैल बरस सडक मर्मतके लाग कौशिक निर्माण सेवा अछाम सडक मर्मत करल रहे । ठाउँठाउँमे फुटल क्याम्पसरोडसे फुलवारीसम १५ किलोमिटर सडक खण्डके लाग गत आर्थिक बरसमे १२ लाख ६२ हजार बजेट विनियोजन हुइल रहे । आस्टके फुलवारीसे कैलारी गाउँपालिकाके कटैनीपुलसमके लाग ११ लाख ९५ हजारके ठेक्का हुइल हुलाकी सडक निर्माण आयोजना जनैले बा ।

यहोर कैलालीके धनगढीसे टीकापुरके सत्तीसमके ४४ किलोमिटर हुलाकी सडक स्तरोन्नति कैना कार्य आघे बह्रल जनाइल बा ।

हुलाकी सडक आयोजना कार्यालय अन्र्तगत सडक स्तरोन्नतिके लाग ठेक्का होके निर्माण कार्य आघे बह्रल जनाइल हो । हुलाकी सडक स्तरोन्नति अन्र्तगत क्याम्परोडसे तीन किलोमिटर चार लेन बनाजैना बा कलेसे अन्य ४१ किलोमिटर सडकहे दुई लेनके रुपमे स्तरोन्नति करजैना बा ।
हुलाकी सडक आयोजना कार्यालयके सूचना अधिकारी पदम मडै कहलै–‘चार चरणमे ठेक्का करल बा ।’ क्याम्पसरोडसे कनरीसम ३७ करोड, कनरीसे फूलबारीसम ३२ करोडके सम्झौता हुइल बा । ओस्टके, कान्द्रा लडियासे सत्तीसम ३२ करोड ६२ लाखमे सम्झौता करल बा कलेसे फूलबारीसे कटैनीसम २७ करोड ९६ लाख ७५ हजारमे सम्झौता करल जनाइल बा ।

यी सक्कु सडक तीन बरसभित्रे सम्पन्न कैना मेरके शौचन्दा जोशी जेभी ठेक्का सम्झौता करले बा ।

हुलाकी सडक कार्यालयके सूचना अधिकारी मडै कहलै–‘निर्माण कम्पनिसे कार्य आघे बह्राइक लाग अब्बे सर्भे करटी रहल बा ।’ उहाँ हुलाकी सडक अलकत्रा प्रविधिमे निर्माण कैना बटैलै । ‘अब्बेक हुलाकी सडकसे लौव प्रविधिसे काम हुइना बा’ उहाँ कहलै ।

धनगढीके क्याम्पस रोडसे कटैनीसमके ३१ किलोमिटर हुलाकी सडकके चौडाई अब्बे जम्मा ३ दशमलव ७५ मिटर रहल बा । अब्बे नेपाल सरकारसे निर्माणाधीन हुलाकी सडकके चौडाई सात मिटर रहल बा ।

‘प्रतिनिधि सभा सदस्य नारदमुनि रानाके नेतृत्वके टोलीसे उ सडकके डिपिआर तयार करल रहे’ मडै कहलै–‘उहे आधारमे सडकके चौडाई बह्रैना कहिके अगहनमे बोलपत्र आह्वान करल रहे ।’ ओहकान अनुसार बोलपत्र अगहनमे जारी करलेसे फेन सम्झौता भर असार ३० गते किल करल रहे ।

उहाँ कहलै–‘पुरान सडकहे फेन अलकत्रा प्रविधिमार्फनै स्तरोन्नति करजैना बा । जबसम एक साइडके सडक निर्माण नाइ हुइ पुरान सडकहे निर्माण कम्पनि मर्मत कैना काम करी ।’

जनाअवजको टिप्पणीहरू