थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १७ अगहन २६४६, शनिच्चर ]
[ वि.सं १७ मंसिर २०७९, शनिबार ]
[ 03 Dec 2022, Saturday ]

सावनिया बेम्टी १ हजार रुप्या किलो

पहुरा | १२ श्रावण २०७७, सोमबार
सावनिया बेम्टी १ हजार रुप्या किलो

पहुरा समाचारदाता
धनगढी, १२ सावन ।
बनुवामे उठ्ना सावनिया बेम्टी मजा बजार मोल पैटी रहल बा । असारसे सावन महिनासम भेंमार (बेमौटा)मे उठ्ना सावनिया बेम्टी प्रति किलो १ हजार रुप्याके दरसे खरिद बिक्री हुइटी रहल हो ।

धनगढी उपमहानगरपालिका १७ के पथरीके स्थानीय रामऔतार चौधरी करिब ५ किलो बेम्टी खोजल बटैलै । उ सक्कु बेम्टी धनगढी बजारमे प्रति किलो १ हजारके दरसे बिक्रि करल जानकारी डेलै । स्वास्थ्यके लाग लाभदायिक ओ बरा मिठ रहना उ बेम्टीक् बजार मोल फेन उच्च रहल उहाँके कहाइ बा ।

पत्रकार अविनाश चौधरी बरसमे एक्के सिजनमे किल उठ्ना ओ बहुट मिठ लग्ना हुइलओरसे किनके हुइलेसे फेन बेम्टी लावांगी करल बटैलै ।

वर्खाके समयमे कैलालीके टमान सामुदायिक बनुवामे बेम्टी उठ्टी रहल बा । जौन बेम्टी बेचके फेन कुछ मनै आपन घर खर्च चलैटी रहल बाटै ।

बेम्टी संगे टमान जंगली टिना फेन बजार पैटी रहल बा । एक पटियाक् साग, ढेंग रजुवा, कोचियालगायत जंगली टिना फेन बजार मोल पैटी रहल बा । धनगढी उपमहानगरपालिका उर्माके संजिता चौधरी कोचिया ५ रुप्या मुठ्ठाके दरसे धनगढी बजारमे बेच्टी आइल बटैठी । असार महिनासे बेच्टी आइल बटैटी उहाँ प्रत्येक दिन ४० से ६० मुठ्ठा कोचियाक् साग बेच्टी आइल ओ ओहीसे घर खर्च चलैटी आइल जनैली ।

जनाअवजको टिप्पणीहरू